ឯកឧត្តមរដ្ឋមន្រ្តី លឹម គានហោ បានអញ្ជើញទទួលជួបពិភាក្សាការងារជាមួយ លោក Oh Yeun Kun អនុប្រធានសារជីវកម្មវិស្វកម្ម Yooshin នៃសាធារណរដ្ឋកូរ៉េ

នៅក្នុងកិច្ចពិភាក្សា លោក Oh Yeun Kun បានបង្ហាញនូវសេចក្តីរីករាយដោយឃើញអំពីភាពរីកចម្រើននៃប្រទេសកម្ពុជានាពេលបច្ចុប្បន្ន និងបានវាយតម្លៃខ្ពស់អំពីការរួមចំណែកនៃវិស័យធនធានទឹកក្រោមការដឹកនាំផ្ទាល់របស់ឯកឧត្តមរដ្ឋមន្រ្តី ក្នុងដំណើរការអភិវឌ្ឍសេដ្ឋកិច្ចជាតិ ដែលសម្រេចបានរហូតមកដល់ពេលនេះ។ លោកអនុប្រធានជម្រាបថា សារជីវកម្មវិស្វកម្មរបស់លោក ពិតជាមានកិត្តិយសដោយត្រូវបានជ្រើសរើសសម្រាប់ជួយលើផ្នែកបច្ចេកទេសក្នុងអនុវត្តគម្រោងក្រោមហិរញ្ញប្បទាននៃសាធារណរដ្ឋកូរ៉េ រួមមានគម្រោង៖ ១)សំណង់ទំនប់ទឹកសាលាតាអន នៅស្រុកឯកភ្នំ ខេត្តបាត់ដំបង និង ២)ការអភិវឌ្ឍន៍ធារាសាស្រ្ត និងកាត់បន្ថយទឹកជំនន់នៅខេត្តបន្ទាយមានជ័យ ដោយលោកប្តេជ្ញាថា នឹងខិតខំបំពេញការងារឲ្យសម្រេចបានតាមផែនការគ្រោងទុក។

ឯកឧត្តមរដ្ឋមន្រ្តី បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារបច្ចេកទេសបម្រើការងារក្នុងគម្រោង និងសមិទ្ធផលការងារនៃគម្រោងដែលសម្រេចបានមកដល់ពេលនេះ និងបានស្នើឲ្យសារជីវកម្មវិស្វកម្មរបស់លោក ត្រូវបំពេញតាមគោលការណ៍និងបទដ្ឋានបច្ចេកទេស ដែលបានកំណត់ និងត្រូវបន្តកិច្ចសហការ និងជួយធ្វើឲ្យគម្រោងអនុវត្តទទួលបានជោគជ័យ និងមានប្រសិទ្ធភាពខ្ពស់ ដើម្បីគាំទ្រដល់គោលបំណងនៃគម្រោងដែលបានកំណត់។

សូមជម្រាបថា គម្រោងសំណង់ទំនប់ទឹកសាលាតាអន មានគោលបំណងសំខាន់ គឺ ១) ការបង្កើនសមត្ថភាពស្រោចស្រពលើផ្ទៃដីរាប់ម៉ឺនហិកតានៅប៉ែកខាងក្រោម ២) ដើម្បីរក្សាស្ថេរភាពទឹកដើម្បីបម្រើដល់ការប្រើប្រាស់ទឹកស្អាតសម្រាប់ខេត្តបាត់ដំបង និង៣) សម្រាប់លើកកម្ពស់សោភ័ណ្ឌភាព និងទាក់ទាញទេសចរណ៍បែបធម្មជាតិ។ គម្រោងនេះ ត្រូវអនុវត្តក្នុងរយៈពេល ០២ឆ្នាំ (២០១៨-២០២០) ដែលរហូតមកដល់ពេលនេះ វឌ្ឍនភាពការងារ គឺសម្រេចបានប្រមាណ ២០ភាគរយ ។ ដោយឡែកសម្រាប់គម្រោងអភិវឌ្ឍន៍ធារាសាស្រ្ត និងកាត់បន្ថយទឹកជំនន់នៅខេត្តបន្ទាយមានជ័យ ក្នុងគោលបំណងដើម្បីកាត់បន្ថយការខូចខាតដោយទឹកជំនន់ និងរាំងស្ងួត ព្រមទាំងសាងសង់ទំនប់ពហុបំណង និងប្រឡាយដើម្បីបម្រើអោយការស្រោចស្រព និងការផ្គត់ផ្គង់ទឹកស្អាត។ ចំពោះដំណើរការនៃគម្រោង រហូតមកដល់ពេលនេះគឺបានចុះកិច្ចសន្យាកាលពីខែកញ្ញា ឆ្នាំ២០១៨ ហើយបច្ចុប្បន្នកំពុងសិក្សាគ្រោងប្លង់ និងចាប់ផ្តើមការងារសាងសង់នាពេលខាងមុខ ។