សភាពាណិជ្ជកម្មកម្ពុជា និងសភាពាណិជ្ជកម្មអន្តរជាតិចិន បានជួបគ្នានៅថ្ងៃទី១៣ ធ្នូនេះ ក្នុងការជួយជម្រុញការអភិវឌ្ឍន៍កម្ពុជា តាមរបត់យុទ្ធសាស្ត្រខ្សែក្រវាត់មួយ ផ្លូវមួយ One Belt, One Road។
One Belt, One Road គឺជាយុទ្ធសាស្ត្រអភិវឌ្ឍន៍មួយ ដាក់ចេញដោយមេដឹកនាំចិន លោកប្រធានាធិបតី ស៊ី ជិនពីង ផ្តោតលើកិច្ចសហប្រតិបត្តិការ និងទំនាក់ទំនងក្នុងចំណោមប្រទេសសំខាន់ៗរវាងប្រទេសចិន និងបណ្តាប្រទេសក្នុងសហគមន៍ អឺរ៉ាស៊ី ដែលគេស្គាល់ថា ជាប្រទេសលើផ្លូវសូត្រនៃខ្សែក្រវ៉ាត់សេដ្ឋកិច្ច Silk Road Economic Belt។
ជំនួបនៃការជួយជម្រុញកម្ពុជា លើរបត់អភិវឌ្ឍន៍យុទ្ធសាស្ត្រខ្សែក្រវាត់មួយ ផ្លូវមួយ នៅថ្ងៃទី១៣ នេះ បានធ្វើតាមរយៈគណៈប្រតិភូ សភាពាណិជ្ជកម្មកម្ពុជា ដឹកនាំដោយ អ្នកឧកញា គិត ម៉េង និងគណៈប្រតិភូមជ្ឈមណ្ឌលពាណិជ្ជកម្មអន្តរជាតិចិន ដឹកនាំដោយអនុប្រធាន លោក ស៊ូ ពីង នៅក្នុងរាជធានីភ្នំពេញ។
មន្ត្រីសភាពាណិជ្ជកម្មទាំង ២ប្រទេស បានថ្លែងថា ក្នុងជំនួបគ្នានេះ ភាគីទាំង២ បានធ្វើបទបង្ហាញស្តីពីបរិយាកាសសេដ្ឋកិច្ច និងឱកាសវិនិយោគនៃប្រទេសនីមួយៗ និងភាគីទាំង២ បានចុះហត្ថលេខាលើកិច្ចព្រមព្រៀងសហប្រតិបត្តិការក្នុងគោលបំណងរួមគ្នាសិក្សាអំពីស្ថានភាព សេដ្ឋកិច្ចរវាងប្រទេសទាំង២។
ប្រទេសចិនគឺជាប្រភពទុនវិនិយោគធំជាងគេនៅកម្ពុជា ផ្អែកតាមការកត់ត្រារបស់ក្រុមប្រឹក្សាអភិវឌ្ឍន៍កម្ពុជា គឹក្នុងរយៈពេល៥ឆ្នាំជាប់ៗគ្នា ពីឆ្នាំ២០១១ ដល់ឆ្នាំ២០១៥ កន្លងមកនេះ វិនិយោគពីប្រទេសចិនចំពោះកម្ពុជា មានតម្លៃបរិមាណសរុប ៤ពាន់ ៩រយលានដុល្លារអាមេរិក។ កម្ពុជា និងចិន មានផែនការណ៍បង្កើនវិនិយោគទុន ចំនួន ៥ពាន់លានដុល្លារ រហូតដល់ឆ្នាំ២០១៧។
សភាពាណិជ្ជកម្មកម្ពុជា និងចិនជួបគ្នាក្នុងរបត់ផ្លូវសូត្រ
