រដ្ឋបាលខេត្តកែប៖ នារសៀលថ្ងៃ អង្គារ៍ ១៣កេីត ខែស្រាពណ៍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៣ ខែសីហា ឆ្នាំ២០១៩ នេះ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត មានរៀបចំពិធី ចែកសម្ភារះម្ហូបអាហារ ជូនដល់ប្រជាពលរដ្ឋ កំពុងខ្វះខាតស្បៀង ចំនួន៧២គ្រួសារ ដែលភាគច្រេីនជាជនចាស់ជរានឹងស្ត្រីមេម៉ាយ។ ពិធីនេះដែរប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ឯកឧត្តម ជិន ប៊ុនស៊ាន ទេសរដ្ឋមន្រ្តី ទទួលបន្ទុកបេសសកម្មពិសេសនឹងជាប្រធានក្រុមការងារថ្នាក់ជាតិចុះមូលដ្ឋានខេត្តកែប និងឯកឧត្ដម កែន សត្ថា អភិបាល នៃគណ:អភិបាលខេត្តកែប រួមជាមួយនឹង ឯកឧត្តម លោកជំទាវ អស់លោក លោកស្រី ក្រុមការងារថ្នាក់ខេត្ត ក្រុង សង្កាត់ និងភូមិផងដែរ។
ឆ្លៀតក្នុងឱកាសនោះដែរ ឯកឧត្តម កែន សត្ថា អភិបាលខេត្តកែប បានមានប្រសាសន៍ថា ដោយសារប៉ុន្មានថ្ងៃកន្លងមកនេះមានភ្លៀងធ្លាក់ខ្លាំងជាបន្តបន្ទាប់ធ្វេីអោយ បាក់ទំនប់ប្រទក្សប្រឡា ដែលបណ្តាលអោយមានទឹកជំនន់កេីតឡេីងខ្លាំង និងរងការប៉ះពាល់ផលដំណាំ ស្រូវអង្ករ និងសត្វពាហនៈ របស់បងប្អូនប្រជាពលរដ្ឋយ៉ាងច្រេីន ឯកឧត្តម បានសំដែងនូវក្តីអាណិតអាសូររួមសុខរួមទុក្ខជាមួយបងប្អូនប្រជាពលរដ្ឋទាំង ៧២គ្រួសារ ដែលកំពុងជួបនូវការខ្វះខាតស្បៀង ដោយសារគ្រោះទឹកជំនន់ និងភាពក្រីក្រ ឯកឧត្តមបន្តថា បេីទោះបីយ៉ាងនេះក្តី អាជ្ញាធរខេត្តកែប គ្រប់លំដាប់ថ្នាក់ ក៏ដូចជា រាជរដ្ឋាភិបាល ដែលដឹកនាំដោយសម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង លោកជំទាវ កិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា គឺដាច់ខាតលោកមិនព្រងើយកន្តើយចំពោះទុក្ខលំបាករបស់បងប្អូនប្រជាពលរដ្ឋឡើយ។ ទោះស្ថិតក្នុងកាលៈទេសៈណាក៏ដោយ ក៏អាជ្ញាធរខេត្តគ្រប់លំដាប់ថ្នាក់ ក៏ដូចជារាជរដ្ឋាភិបាលដែលមានសម្តេចអគ្គសេនាបតីតេជោ ហ៊ុន សែន ជានាយករដ្ឋមន្ត្រី គឺប្តេជ្ញាដាច់ខាតមិនឲ្យប្រជាពលរដ្ឋណាម្នាក់ដែលរងគ្រោះដោយទឹកជំនន់ និង ស្ត្រី
មេម៉ាយគ្មានទីពឹងដាច់ពោះស្លាប់ដោយសារខ្វះស្បៀងអាហារនោះឡើយ គឺអាជ្ញាធរខេត្តនិងរាជរដ្ឋាភិបាលនៅតែគិតគូរ និងយកចិត្តទុក្ខដាក់ជានិច្ចចំពោះបងប្អូនប្រជាពលរដ្ឋ។
ឯកឧត្តម សូមអោយប្រជាពលរដ្ឋយកចិត្តទុកដាក់លេីការថែរក្សាសុខភាព នៅពេលទឹកស្រកចុះទៅវិញ ព្រោះជំងឺខ្លះអាចឆ្លងតាមរយៈទឹកជំនន់ ដែលអាចធ្វេីអោយប៉ះពាល់ដល់សុខភាព របស់បងប្អូនយេីង ជាពិសេស កុមារា កុមារី
អាណាព្យាបាល ត្រូវបង្ការការប្រុងប្រយ័ត្នចំពោះការបរិភោគទឹកនឹងចំណីអាហារ ត្រូវអោយកូនៗបរិភោគទឹកដែលដាំពុះល្អ និងលាងសំអាតដៃ អោយបានស្អាតនៅពេលបរិភោគអាហារ ។
ឯកឧត្តម បានជូនអំណោយដល់ប្រជាពលរដ្ឋដែលជួបការខ្វះខាត ទឹកជំនន់ ស្រ្តីមេម៉ាយ និង ជនក្រីក្រទាំង ៧២ គ្រួសារនោះ មានមី១កេស អង្ករចំនួន៥០គីឡូក្រាម ទឹកស៊ីអុីវ១យួរ ទឹកត្រី១យួរ ភួយ១ មុង១ កន្ទេល១ សារុង១ ប៊ីចេង១បញ្ចប់ ត្រីខកន្លះយួរ ចានដែកគក់ខោអាវ ១ ថ្នាំព្យាបាលជំងឺឬសដូង១ដប ក្នុងនោះប្រជាពលរដ្ឋក្នុងមួយ
គ្រួសារក៏ទទួលការឧបត្ថម្ភថវិកាចំនួន២ម៉ឺនរៀលពី ឯកឧត្តម ជិន ប៊ុន ស៊ាន ផងដែរ។