ថ្ងៃអង្គារ ១២រោច ខែស្រាពណ៍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៧ ខែសីហា ឆ្នាំ២០១៩ នៅសាលាខេត្តសៀមរាប លោក ពៅ ពិសិដ្ឋ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានអនុញ្ញតឲ្យឯកអគ្គរាជទូតចក្រភពអង់គ្លេសប្រចាំកម្ពុជា ជួបសម្ដែងការគួរសម ពិភាក្សាការងារ និងបេីកសិក្ខាសាលាផ្សព្វផ្សាយស្ដីពីអាហារូបករណ៍ Chevening ថ្នាក់អនុបណ្ឌិត ដឹកនាំដោយ លោកជំទាវ Tina Redshaw និងមានការចូលរួមពី មន្ត្រីមកពីមន្ទីរ-អង្គភាព ចំណុះខេត្តសៀមរាប សាស្ត្រាចារ្យ លោកគ្រូ អ្នកគ្រូ បញ្ញាវ័ន្ត សិស្ស-និសិ្សតតាមបណ្ដាសាកលវិទ្យាល័យ និងវិទ្យាស្ថានអប់រំក្នុងខេត្តសៀមរាប សរុបចំនួន ៨៥នាក់។
លោកអភិបាលរងខេត្ត បានថ្លែងអំណរគុណយ៉ាងជ្រាលជ្រៅដល់ លោកជំទាវ ឯកអគ្គរាជទូត គណៈប្រតិភូ ពិសេសរាជរដ្ឋាភិបាលអង់គ្លេសដែលតែងតែជួយជ្រោមជ្រែងលេីវិស័យអបរំ សុខាភិបាល និងវិស័យអាទិភាពពាក់ព័ន្ធជាច្រេីនទៀត ។
អាហាររូបករណ៍ Chevening របស់រាជរដ្ឋាភិបាលអង់គ្លេសជាកម្មវិធីដែលផ្ដល់ឱកាសឲ្យ មន្ត្រីរាជការ សាស្ត្រាចារ្យ លោកគ្រូ អ្នកគ្រូ និស្សិត ចំនួន១៥០ប្រទេស ជុំវិញពិភពលោកដែលមានចំណាប់អារម្មណ៍ចង់ដាក់ពាក្យចូលរួមប្រលងអាហាររូបករណ៍បាន តែត្រូវមានបទពិសោធន៍ការងារ(រដ្ឋ ឬឯកជន) យ៉ាងតិច ២ឆ្នាំ ឬ ២៨០០ម៉ោង មានសញ្ញាបត្របរិញ្ញាបត្រ និងមានពិន្ទុល្អផ្នែកភាសាអង់គ្លេស ហេីយការសិក្សាមានរយៈពេល ១ឆ្នាំ។
លោកស្រី Tina Redshaw ឯកអគ្គរាជទូតអង់គ្លេស បានថ្លែងថា «ការទៅសិក្សានៅប្រទេសអង់គ្លេស គឺស្មើនឹងការទទួលបានការសិក្សាលំដាប់ពិភពលោក នៅឯគ្រឹះស្ថានអប់រំដ៏មានឈ្មោះបោះសំលេង ក្នុងចំណោមសាកលវិទ្យាល័យកំពូលទាំងដប់ក្នុងពិភពលោក មានសាកលវិទ្យាល័យកំពូលដល់ទៅបីឯណោះ ដែលមានទីតាំងនៅប្រទេសអង់គ្លេស។
អង់គ្លេសជាប់ចំណាត់ថ្នាក់លេខពីរក្នុងពិភពលោក លើផ្នែកវិទ្យាសាស្ត្រ និងស្រាវជ្រាវ ហើយ៥៤ភាគរយ នៃលទ្ធផលការងារ ដែលកើតចេញពីវិស័យទាំងពីរនេះ គឺសុទ្ធតែនាំមុខគេក្នុងពិភពលោក។ ការសិក្សានៅប្រទេសអង់គ្លេស ក៏ជួយពង្រីកឱកាសទទួលបានការងាររបស់អ្នកទាំងអស់គ្នាផងដែរ»។
លោកស្រី បន្ដថា «លទ្ធផលស្ថិតិលំដាប់ពិភពលោកជាច្រើន បានបង្ហាញឱ្យឃើញជាបន្តបន្ទាប់ថា សញ្ញាបត្រពីប្រទេសអង់គ្លេស សុទ្ធតែទទួលបានការវាយតម្លៃខ្ពស់ នៅទូទាំងពិភពលោកទាំងមូលតែម្ដង។ អង់គ្លេស ស្ថិតក្នុងចំណោមប្រទេសកំពូលទាំងប្រាំ លើពិភពលោក លើផ្នែកសហការរវាងក្រុមហ៊ុន និងសាកលវិទ្យាល័យ។ កត្តានេះជួយផ្ដល់ឱកាសកាន់តែខ្ពស់ សម្រាប់ឱ្យនិស្សិតដែលបញ្ចប់ការសិក្សា អាចទទួលបានការងារធ្វើ និងឱកាសការងារល្អៗជាច្រេីន ជាហេតុនាំឱ្យនិស្សិតនោះមានប្រៀបជាងនិស្សិតដ៏ទៃ នៅក្នុងទីផ្សារការងារទាំងក្នុងស្រុក និងអន្តរជាតិ»៕