រាជធានីភ្នំពេញ៖ សិក្ខាសាលាផ្សព្វផ្សាយដាក់ឱ្យអនុវត្តជាផ្លូវការឯកសារគោលការណ៍ណែនាំអនុវត្តការគ្រប់គ្រងសាលារៀនសម្រាប់មត្តេយ្យសិក្សាសាធារណៈ ត្រូវបានរៀបចំឡើងដើម្បីអនុវត្តការធ្វើកំណែទម្រង់ការគ្រប់គ្រងសាលារៀន និងសិក្សាពីគោលគំនិតនៃការគ្រប់គ្រងតាមសាលារៀន និងការអនុវត្ត។
កម្មវិធីនេះបានប្រព្រឹត្តទៅក្រោមអធិបតីភាពលោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា។ ក្នុងឱកាសនោះ លោកជំទាវរដ្ឋលេខាធិការ បានគូសបញ្ជាក់ថា ការគ្រប់គ្រងសាលារៀន ជារបៀបវារៈមួយ ក្នុងចំណោមរបៀបវារៈអាទិភាពសម្រាប់គាំទ្រការធ្វើកំណែទម្រង់វិស័យអប់រំ។ លោកជំទាវបានបន្ថែមថា ផែនការយុទ្ធសាស្ត្រ ២០១៩-២០២៣ បានប្តេជ្ញាចិត្តយ៉ាងមុតមាំក្នុងការកសាងធនធានមនុស្សប្រកបដោយគុណភាព និងគុណធម៌ ធ្វើយ៉ាងណាដឹកនាំសង្គមកម្ពុជាប្រកបដោយពុទ្ធិ។
ឆ្លៀតក្នុងឱកាសនោះ លោកជំទាវក៏បានថ្លែងអំណរគុណ ចំពោះកិច្ចខិតខំប្រឹងប្រែងរួមគ្នារបស់នាយកដ្ឋានជំនាញ អ្នកទទួលបន្ទុកកិច្ចការកុមារតូច ទាំងថ្នាក់ជាតិ និងថ្នាក់ក្រោមជាតិ អាជ្ញាធរ អ្នកពាក់ព័ន្ធ និងមន្ត្រីជាន់ខ្ពស់ធនាគារពិភពលោក ដែលបានរួមសហការគ្នា ដើម្បីចងក្រងឯកសារគោលការណ៍ទី១ ស្ដីពីការណែនាំអនុវត្តការគ្រប់គ្រងសាលារៀនសម្រាប់មត្តេយ្យសិក្សាសាធារណៈ ព្រមទាំងរៀបចំសិក្ខាសាលានេះឡើង។ សូមជម្រាបថា កម្មវិធីនេះ មានការចូលរួមពីតំណាងអង្គភាពពាក់ព័ន្ធថ្នាក់ជាតិ ថ្នាក់ដឹកនាំ និងមន្ត្រី អប់រំកុមារតូច ថ្នាក់រាជធានី ខេត្ត និងតំណាងដៃគូពាក់ព័ន្ធ៕
១ តុលា ២០១៩ | សាលាមធ្យមសិក្សាគរុកោសល្យមត្តេយ្យមជ្ឈិម រាជធានីភ្នំពេញ