តាកែវ៖នាព្រឹកថ្ងៃទី ២៤ ខែវិច្ឆិកា ឆ្នាំ២០១៩ ឯកឧត្តម យស ណាស៊ី ប្រធានក្រុមប្រឹក្សាខេត្ត ឯកឧត្តម អ៊ូច ភា អភិបាលខេត្តតាកែវ និងជាប្រធានអនុគណៈកម្មការសុវត្ថិភាពចរាចរណ៍ ផ្លូវគោកខេត្តតាកែវ បានអញ្ជេីញជាអធិបតី ក្នុងទិវា អន្តរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៤ នៅសាលប្រជុំសាលាខេត្ត ដោយមានការចូលរួមពីសំណាក់លោក ណុប នី ប្រធានមន្ទីរសាធារណៈការ និងដឹកជញ្ជូនខេត្ត រួមជាមួយនឹងលោកស្នងការរងនគរបាលខេត្ត ប្រធានមន្ទីរអង្គភាពជុំវិញខេត្ត សិស្សានុសិស្សជាច្រើននាក់ ។
ក្នុងឱកាសនោះ ឯកឧត្តម អ៊ូច ភា អភិបាលខេត្តតាកែវ និងជាប្រធានអនុគណៈកម្មការសុវត្ថិភាពចរាចរណ៍ បានមានប្រសាសន៍ថា ការរៀបចំទិវានាពេលនេះ គឺជាសកម្មភាពមួយដែលរដ្ឋបាលខេត្ត និងជាអនុគណៈកម្មការសុវត្ថិភាពចរាចរណ៍ខេត្តតាកែវ បានខិតខំប្រឹងប្រែងយកចិត្តទុកដាក់ខ្ពស់ គិតគូរ ដល់បងប្អូនប្រជាពលរដ្ឋគ្រប់ស្រទាប់វណ្ណៈអំពីបញ្ហាគ្រោះថ្នាក់ចរាចរណ៍ និងឧទ្ទិសកុសលដល់វិញ្ជាណក្ខន្ធដល់អ្នកស្លាប់ជាច្រើនដោយសារគ្រោះថ្នាក់ចរាចរណ៍ ដែលកើតឡើងជាញឹកញ៉ាប់តាមដងផ្លូវ មិនថា តាមបណ្តាលក្រុងស្រុកទូទាំងខេត្ត ឬនៅទូទាំងប្រទេសឡើង ។
ឯកឧត្តមអភិបាលខេត្ត បន្តថា គ្រោះថ្នាក់ចរាចរណ៍នេះ វាជាកត្តាមួយធ្វើឲ្យអន្តរាយដល់អាយុ ជីវិតមនុស្ស សត្វ បរិស្ថាន ខូចខាតទ្រព្យសម្បត្តិរដ្ឋ និងឯកជន ដោយមិនទាន់គិតការបន្សល់ទុកស្រ្តីមេម៉ាយ កូនកំព្រា ការនិរាសព្រាត់ប្រាស់ក្នុងគ្រួសារ និងជនពិការឡើយ ។ ម្យ៉ាងវិញទៀតការបាត់ បង់ទ្រព្យសម្បត្តិមានចំនួនលើសលប់ បានជិះឥទ្ធពលធ្ងន់ធ្ងរផងដែរ ដល់សេដ្ឋកិច្ចជាតិ គោលនយោបាយកាត់បន្ថយភាពក្រក្រី និងការអភិវឌ្ឍន៍លើគ្រប់វិស័យរបស់រាជរដ្ឋាភិបាលផងដែរ ។ ដូច្នោះយើង ត្រូវរួមគ្នាទប់ស្កាត់កាត់បន្ថយគ្រោះថ្នាក់ចរាចរណ៍ ដែលបាននឹងកំពុងកើតមានឡើងឥតឈប់ឈរ ជារៀងរាល់ថ្ងៃ ពិសេសខេត្តតាកែវយើង ដែលបញ្ហានេះបណ្តាលមកពីកត្តាធំៗចំនួន៣គឺ កត្តាមនុស្ស កត្តាយានយន្ត និងកត្តាផ្លូវថ្នល់ ។
បើតាមរបាយការណ៍របស់លោក ណុប នី ប្រធានមន្ទីរសាធារណៈការ និងដឹកជញ្ជូនខេត្ត បានឲ្យដឹងថា ក្នុងរយៈពេល៩ខែ ឆ្នាំ២០១៩នេះ មន្ទីរបានធ្វើការអប់រំផ្សព្វផ្សាយច្បាប់ស្តីពី ចរាចរណ៍ ផ្លូវគោក និងធ្វើយុទ្ធនាការរឹតបន្តឹងការពាក់មួកសុវត្ថិភាពជូនដល់សិស្សានុសិស្សតាមបណ្តាសាលារៀន តាមផ្លូវជាតិ ផ្លូវខេត្ត ក្នុងទីប្រជុំជន ទូទាំងខេត្តចំនួន ២២លើក មានអ្នកចូលរួម និងឆ្លើយសំណួរពាក់ព័ន្ធនឹងច្បាប់ចរាចរណ៍ផ្លូវគោកចំនួន ៥.១៨៦នាក់ ស្រី២.១៦១នាក់ ក្នុងនោះអ្នកឆ្លើយសំណួរត្រូវចំនួន៣៥៤នាក់ ដែលទទួលបានមួកសុវត្ថិភាពម្នាក់មួយដោយឥតគិតថ្លៃ ហើយចំពោះអ្នកឆ្លើយមិនត្រូវ ទទួលបានសៀវភៅច្បាប់ស្តីពីចរាចរណ៍ផ្លូវគោក និងឯកសារសុវត្ថិភាពចរាចរណ៍ផ្លូវគោកមួយចំនួនដូចជា៖ សៀវភៅច្បាប់ស្តីពីចរាចរណ៍ផ្លូវគោក ចំនួន ២៥៤ក្បាល សៀវភៅអ្វីដែលអ្នកបើកបរត្រូវយល់ដឹងចំនួន ៧២០ក្បាល ស្ទីកគ័រចំណាំងផ្លាតពាក់ខ្សែក្រវ៉ាត់សុវត្ថិភាពចំនួន ៤.៤០០សន្លឹក ផ្ទាំងរូបភាព សញ្ញាចតទីប្រជុំជន ចំនួន ៩៥សន្លឹក សីលធម៌១០ចំណុច ៥០សន្លឹក ១០ចំណុចដើម្បីសុវត្ថិភាព ៨១០សន្លឹក សញ្ញាចរាចរណ៍សំខាន់ៗ ២០សន្លឹក កាតសវុត្ថិភាព ២.៣៥០សន្លឹក ថ្ងៃនេះថ្ងៃស្អែកកុំឲ្យ មានគ្រោះថ្នាក់ចរាចរណ៍ ៨៨សន្លឹក រូបភាពកំណត់ទំហំរថយន្តនិងការកំណត់ទំហំផ្ទុកទំនិញ ៨៤សន្លឹក ស្ទីកគ័រចំណាំងផ្លាត ៦៥០សន្លឹក ប្រការសំខាន់ៗដែលត្រូវចងចាំចំពោះអ្នកប្រើប្រាស់ផ្លូវ ៣០០សន្លឹក ផ្ទាំងរូបភាពអ្នកថ្មើរជើង ១០សន្លឹក ផ្ទាំងរូបភាព 40Km/h ចងបដាពាក្យស្លោកចរាចរណ៍ផ្លូវគោក ១៣ផ្ទាំង ៕
