ថ្ងៃពុធ ១កើត ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៧ ខែវិច្ឆកា ឆ្នាំ២០១៩ រដ្ឋបាលខេត្តបាត់ដំបងបានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំ២០១៩ ដោយផ្តោតសំខាន់លើប្រធានបទ “ការផ្តល់សេវា និងការអភិវឌ្ឍមូលដ្ឋាន” ។ វេទិកាក្នុងថ្ងៃនេះផងដែរ បានការអញ្ជើញជាគណៈអធិបតីរួមមាន ឯកឧត្តម អ៊ុយ រី ប្រធានក្រុមប្រឹក្សាខេត្ត ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង ឯកឧត្តម លោកជំទាវសមាជិក ក្រុមប្រឹក្សាខេត្ត លោក លោកស្រី អភិបាលរងខេត្ត ព្រមទាំងមានការអញ្ជើញចូលរួមជាវាគ្មិន ពីតាមមន្ទីរ អង្គភាព ជំនាញ ដោយធ្វើការបែងចែកចំនួន០៧ស្រុក ក្នុងនោះមានស្រុករុក្ខគិរី ស្រុកបវេល ស្រុកសំឡូត ស្រុកសង្កែ ស្រុកមោងឬស្សី ស្រុកថ្មគោល និងស្រុករតនមណ្ឌល ។
សូមបញ្ជាក់ផងដែរថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តបាត់ដំបង អាណត្តិទី៣ សម្រាប់ឆ្នាំ២០១៩ នេះមានរយៈពេល០២ថ្ងៃ គឺចាប់ពីថ្ងៃទី ២៧-២៨ ខែវិច្ឆិកា ឆ្នាំ២០១៩ ដែលមានចំនួន ១៤ក្រុង ស្រុក ក្នុងខេត្តបាត់ដំបង ។
វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត បាត់ដំបង អាណត្តិទី៣ សម្រាប់ឆ្នាំ២០១៩ នេះមានរបៀវារៈដូចខាងក្រោម
១-ផ្សព្វផ្សាយពីគោលបំណង លទ្ធផលរំពឹងទុក និងបទបញ្ជាផ្ទៃក្នុងសម្រាប់វេទិកា
២-សុន្ទរកថាបើកអង្គវេទិកា និងរបាយការណ៍សង្ខេប រយៈពេល ៩ ខែ ដើមឆ្នាំ២០១៩ របស់រដ្ឋបាលខេត្ត
៣-ការពិភាក្សា និងពិគ្រោះយោបល់ ដោយមានសំណួរ សំណូមពរ ពីអង្គវេទិកា
៤-ធ្វើការផ្សព្វផ្សាយពីតួនាទី ភារកិច្ច របស់ការិយាល័យប្រជាពលរដ្ឋ
៥-សុន្ទរកថាបិទ និងការចូលរួមពីគណៈអធិបតី
អង្គវេទិកាបានលើកឡើងនូវសំណួរ សំណូមពរ ក៏ដូចជាបញ្ហាប្រឈមនានា នៅក្នុងមូលដ្ឋាន ជូនដល់គណៈអធិបតី ដើម្បីពិនិត្យ និងជួយដោះស្រាយ ។ បន្ទាប់ពីទទួលបាននូវសំណួរ សំណូមពរ ក៏ដូចជាបញ្ហាប្រឈមនានា គណៈអធិបតី ព្រមទាំងមន្ទីរ អង្គភាព បានឡើងឆ្លើយតប ដោះស្រាយទៅតាមសំណួរ និងសំណូមពរ ក៏ដូចជាក្តីកង្វល់ជូនប្រជាពលរដ្ឋនៅតាមមូលដ្ឋាន ។
