អង្គការ Global Witness ដែលតែងគុំគួនក្រុមគ្រួសារសម្តេចតេជោសែន បានចេញសេចក្តីថ្លែងការណ៍មួយនៅ ក្នុងក្រុងដាវ៉ូសនៃប្រទេសស្វីស ស្វែងរកការរារាំង សម្តេចតេជោនាយករដ្ឋមន្ត្រី ហ៊ុន សែន ចូលរួមក្នុងវេទិកាសេដ្ឋកិច្ចពិភពលោក។ សេចក្តីថ្លែងការណ៍នេះ ត្រូវគេឃើញថា មិនមានការគាំទ្រណាមួយពីសមាជិកជាង ៣០ប្រទេស ពីសកល លោក ដែលបានចូលរួមនោះឡើយ។
មន្ត្រីអ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានថ្លែងនៅថ្ងៃទី ១៨មករានេះថា ការលើកឡើងរបស់ Global Witness គឺជាការបង្ហាញការអស់សង្ឃឹម និងបង្ហាញពីភាពទ័លច្រកតបនឹងបរាជ័យ នៃរបាយការណ៍របស់ខ្លួនឯង ដែលតែងប្រឌិតបំផុសបំផុល និងធ្វើការញុះញង់អោយគេស្អប់ខ្មែរ ក្នុងរយៈពេលកន្លងមក។
Global Witness គឺជាអង្គការអន្តរជាតិមួយ ដែលបង្កើតឡើងក្នុងឆ្នាំ១៩៩៣ ដែលមានទីតាំងក្នុងក្រុងឡុងដ៍ ប្រទេសអង់គ្លេស និងស្ថិតក្នុងក្រុង Washington សហរដ្ឋអាមេរិកផងដែរ។ របាយការណ៍របស់អង្គការនេះចំពោះកម្ពុជា បានរងនឹងការរិះគន់ជាខ្លាំងពីរាជរដ្ឋាភិបាល ដែលចោទថាមានទំនោរលំអៀង និងខុសពីតួលេខនៃការពិតជាក់ស្តែង។
ក្នុងសេចក្តីថ្លែងការណ៍មួយរបស់ global witness ចុះថ្ងៃទី ១៨ ខែមករា ឆ្នាំ២០១៧ អង្គការនេះបានបន្តការវាយប្រហារដល់ក្រុមគ្រូសារ សម្តេចតេជោសែន និងបានព្យាយាមមិនអោយរាជរដ្ឋាភិបាលកម្ពុជា ផ្សព្វផ្សាយវីដេអូ «ផ្កាយ កំពុងរះរបស់ អាស៊ាន» ដែលជាកម្មវិធីទាក់ទាញទេសចរណ៍ និងការវិនិយោគបរទេសទៅកាន់កម្ពុជានោះឡើយ។
កម្ពុជាបានឆ្លងកាត់ការដាក់ទណ្ឌកម្មពិភពលោកចំនួន ១១ឆ្នាំ មកហើយ ដោយសារតែរបាយការណ៍មិនពិតអំពីកម្ពុជា នៅអង្គការសហប្រជាជាតិរវាងពីឆ្នាំ១៩៧៩ ដល់ឆ្នាំ១៩៩០។ ប៉ុន្តែក្រោមនយោបាយឈ្នះៗ ដែលធ្វើអោយអស់សង្គ្រាមស៊ីវិលនៅចុងឆ្នាំ១៩៩៨ កម្ពុជាបានបោះជំហានទៅរកការអភិវឌ្ឍន៍ពិតប្រាកដ។
មន្ត្រីរាជរដ្ឋាភិបាលបានថ្លែងថា ភាពគុំគួនរបស់អង្គការ Global Witness មិនអាចធ្វើអោយកម្ពុជាប្រែប្រួលចេញពីការគាំទ្រជាអន្តរជាតិបានទេ… ហើយក៏មិនអាចទាញដំណើរសេដ្ឋកិច្ចទៅមុខរបស់កម្ពុជា ឱ្យថយក្រោយបានដែរ និងក៏មិនអាចធ្វើអោយកម្ពុជា វិលទៅអតីតកាលនៃសង្គ្រាមនោះបានឡើយ។
