សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានផ្ញើសាររំលែកទុក្ខ ចំពោះមរណភាព លោកជំទាវ លី គឹម ត្រូវជាភរិយារបស់ ឯកឧត្តម សោម ចិន កាលពីរាត្រីថ្ងៃច័ន្ទ ៤រោច ខែបុស្ស ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៣ ខែមករា ឆ្នាំ២០២០ ដោយរោគាពាធ ក្នុងជន្មាយុ៦៧ឆ្នាំ។
ក្នុងសារលិខិតរំលែកទុក្ខ សម្តេចប្រធានព្រឹទ្ធសភា បានមានប្រសាសន៍ថា “ការបាត់បង់រូបកាយ លោកជំទាវ លី គឹម សោមចិន គឺជាការបាត់បង់នូវភរិយា មាតា ជីដូន ជាទីស្រលាញ់ប្រកបដោយ ព្រហ្មវិហារធម៌សម្រាប់កូនៗ និងចៅៗទាំងអស់។ រូបកាយ លោកជំទាវ លី គឹម សោមចិន បាត់បង់ទៅក៏ពិតមែន ប៉ុន្តែកិត្តិយស សេចក្តីថ្លៃថ្នូ និងអំពើជាកុសលក្នុងការបូជាកម្លាំងកាយចិត្ត ដើម្បីអប់រំ បីបាច់ថែរក្សាបុត្រា បុត្រី ចៅប្រុស ចៅស្រី អោយក្លាយជាកុលបុត្រ កុលធីតាដ៏ឆ្នើមរបស់ជាតិ ពិតជាមិនបាត់បង់ឡើយ។”
សម្តេចប្រធានព្រឹទ្ធសភា សូមបួងសួងដល់វត្ថុស័ក្តសិទ្ធក្នុងលោក និងតេជៈបារមី នៃព្រះពុទ្ធ ព្រះធម៌ ព្រះសង្ឃ តាមជួយបីបាច់ថែរក្សាដល់ដួងវិញ្ញាណក្ខ័ន្ធរបស់ លោកជំទាវ បានទៅសោយសុខក្នុងសុគតិភព ជានិច្ចនិរន្តរ៍តរៀងទៅ…។
