ខេត្តព្រៃវែង៖ ថ្នាក់ដឹកនាំក្រសួងអប់រំ យុវជន និងកីឡា បានអញ្ជើញចុះសំណេះសំណាលសួរសុខទុក្ខ និងប្រគល់លិខិតថ្លែងអំណរគុណដល់គរុសិស្សដែលបានបំពេញភារកិច្ចជាជំនួយការអប្បមាទទូទាំងប្រទេស នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១៩ សីហា ២០១៩ កន្លងទៅនេះប្រកបដោយស្មារតីទទួលខុសត្រូវខ្ពស់ និងទទួលបានជោគជ័យ។
ពិធីប្រគល់នេះលិខិតថ្លែងអំណរគុណនេះ បានប្រព្រឹត្តទៅក្រោមអធិបតីភាពឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ ក្នុងឱកាសនេះដែរ ឯកឧត្ដមរដ្ឋមន្ត្រីក៏បានថ្លែងអំណរគុណដល់ប្អូនៗ គរុសិស្សដោយផ្ទាល់ និងបានផ្ដាំផ្ញើដល់ប្អូនៗគរុសិស្សឲ្យខិតខំរៀនសូត្រ ពង្រឹងចំណេះដឹងបន្ត ទទួលបានជោគជ័យនៅពេលប្រឡងចេញ និងយកសមត្ថភាពទៅដើម្បីបំពេញការងារនៅថ្ងៃមុខជាប្រយោជន៍សម្រាប់ប្រទេសជាតិ៕
០៣ កុម្ភៈ ២០២០
