(ភ្នំពេញ)៖ គ្រូពេទ្យកម្ពុជាយើង ដែលនៅជួរមុខប្រយុទ្ធនឹងជំងឺកូវីដ ១៩ មិនរុញរាឡើយ។ ក្នុងនោះ បើទោះបីជាក្រុមគ្រួសារ បានបង្ហាញក្តីបារម្ភចំពោះខ្លួនយ៉ាងណាក្តី ក៏គ្រូពេទ្យកម្ពុជាយើង នៅតែបំពេញតួនាទីជាគ្រូពេទ្យ ពិនិត្យព្យាបាលអ្នកជំងឺនៅតាមមន្ទីរពេទ្យ ទាំងយប់ ទាំងថ្ងៃ ហើយផ្តាំឲ្យក្រុមគ្រួសារ ត្រូវមានមោទកភាព បើសិនរូបគេ ជាគ្រូពេទ្យ ឆ្លងជំងឺកូវីដ ដោយសារតែការពិនិត្យព្យាបាលអ្នកជំងឺនោះ។
នេះគឺជាសម្តីគ្រូពេទ្យ នៅមន្ទីរពេទ្យខេត្តបាត់ដំបង ដែលបានបង្ហោះតាមហ្វេសប៊ុក Menghak Ngoun៖ «ម៉ាក់ខ្ញុំ គាត់សួរខ្ញុំ មិចហើយកូន ម៉ាក់លីថា គេផ្ទុះ កូរូណា កូនត្រូវប្រយ័ត្នណា កូនកុំសូវប៉ះពាល់ជាមួយអ្នកជំងឺពេក ហើយ ខ្ញុំឆ្លើយទៅម៉ាក់វិញថា អត់អីទេម៉ាក់ ខ្ញុំ ជាគ្រូពេទ្យខ្ញុំមានតួរនាទី មើលថែរក្សា ការពារអ្នកជំងឺ អោយជាសះស្បើយ ទៅតាមបច្ចេកទេសវិជ្ជសាស្ត្រ តែ បើខ្ញុំមានបញ្ហាអ្វី ម៉ាក់ត្រូវតែ មានមោទនភាពលើកូន ដែលមានកូនធ្វើជាពេទ្យ ហើយស្គាល់តួនាទី ជាពេទ្យ»។
ដោយមានរូបថតជាច្រើន បង្ហាញពីគ្រូពេទ្យ ស្លៀកពាក់ឯកសណ្ឋាន ឧបករណ៍ការពារ ក្នុងពេលពិនិត្យព្យាបាលអ្នកជំងឺកូវីដ លោកគ្រូពេទ្យ បន្តថា «ដល់ម៉ោងទៀតហើយ មើលគាត់លែងស្គាល់ហើយ, ក្រុមគ្រូពេទ្យជួរមុខនៃមន្ទីរពេទ្យបង្អែកខេត្តបាត់ដំបង មានពាក្យអីជូនពរ នឹងលើកទឹកចិត្តគាត់ទេ។ ក្រុមគ្រូពេទ្យសំរុក គ្រប់មន្ទីរពេទ្យ ️សូមអោយក្រុមពេទ្យទាំងអស់មានសុខភាពល្អ
️អគុណសំរាប់ការលះបង់របស់គ្រូពេទ្យគ្រប់ផ្នែក។
ជាចុងក្រោយ លោកគ្រូពេទ្យ ក៏បានអំពាវនាវ សូមបងប្អូនការពារ និងអនាម័យ អោយសមស្របទៅនឹងសារាចរណ៍របស់ក្រសួងសុខាភិបាល និងអង្គការសុខភាពពិភពលោក WHO។ សូមប្រជាជនខ្មែរ រួមគ្នាសាមគ្គីគ្នា ជាធ្លុងមួយ ដើម្បីប្រយុទ្ធប្រឆាំងនឹងជំងឺថ្មី Covid 19 នេះ កុំអោយកើតមានបន្តលើទឹកដីរបស់យើង៕