(កំពង់ចាម)៖ ឯកឧត្តមបណ្ឌិត ម៉ា ឈឿន អ្នកតំណាងរាស្ដ្រមណ្ឌលកំពង់ចាម និងជាប្រធានក្រុមការងារគណបក្សប្រជាជនកម្ពុជា ចុះជួយស្រុកជើងព្រៃ បានថ្លែងថាកាលណាយើងមានសន្ដិភាព ទើបយើងមានការអភិវឌ្ឍ ផ្ដើមចេញពីមានសន្ដិភាពទូទាំងប្រទេសនេះហើយ ដែលធ្វើឱ្យប្រជាពលរដ្ឋយើងមានសេរីភាព លទ្ធភាពអភិវឌ្ឍវិស័យពុទ្ធសាសនាផង វិស័យអាណាចក្រ មានសាលារៀន មន្ទីរពេទ្យ ស្ពាន ថ្នល់ វត្ដអារាម និងសមិទ្ធិផលជាច្រើនទៀត ។
តំណាងរាស្ត្រ ឯកឧត្តមបណ្អិត ម៉ា ឈឿន បន្តថា «ដូច្នេះយើងមិនត្រូវបំផ្លាញសន្ដិភាព ហើយត្រូវប្រឆាំងដាច់ខាតចំពោះបុគ្គលទាំងឡាយណា មានបំណងចង់បំផ្លាញសន្ដិភាព ដែលយើងរកបានទាំងការលំបាកបំផុត ហើយការនាំនូវមកសន្ដិភាព ជូនជាតិ និងប្រជាជនរបស់យើងសព្វថ្ងៃនេះ ជាស្នាដៃរបស់គណបក្សប្រជាជនកម្ពុជា ដូចនេះយើងត្រូវរួមគ្នាថែរក្សាសន្ដិភាពឱ្យឋិតថេរ រឹងមាំជារៀងរហូតទៅ»។
ការថ្លែងដូច្នេះរបស់តំណាងរាស្ត្រមណ្ឌលកំពង់ចាម ក្នុងឱកាសអញ្ជើញសម្ពោធសមិទ្ធផលនានា ក្នុងវត្ដសុគន្ធារាម ហៅវត្ដស្គន់ ស្ថិតនៅភូមិ ប៉ាណា ឃុំសូទិប ស្រុកជើងព្រៃ ខេត្ដកំពង់ចាម នាថ្ងៃទី២១ ខែកុម្ភៈ ឆ្នាំ២០២២នេះ។
តំណាងរាស្ត្ររូបនេះ ក៏បានអំពាវលើកទឹកចិត្តចំនួន៥ចំនុចថា ១៖ ត្រូវបន្ដថែរក្សាសន្ដិភាព ដើម្បីបន្ដអភិវឌ្ឍប្រទេសជាតិយើងលើគ្រប់វិស័យ ២៖ ត្រូវរួមគ្នាការពារ ទប់ស្កាត់ ប្រយុទ្ធនឹងជំងឺកូវីដ១៩ ពិសេស ជាមួយមេរោគបម្លែងថ្មី អូមីក្រុង និងត្រូវយកចិត្ដទុកដាក់ថែរក្សាសុខភាពឱ្យបានល្អ ៣៖ អាជ្ញាធរដែនដី ត្រូវយកចិត្ដទុកបម្រើសេវាសាធារណៈជូនប្រជាពលរដ្ឋ ឱ្យបានល្អប្រសើរនូវសេចក្ដីត្រូវការរបស់ប្រជាជន ទោះបីយប់ ឬថ្ងៃក្ដី និងនៅគ្រប់ទីកន្លែង ៥៖ត្រូវបន្ដអនុវត្ដគោលនយោបាយ ភូមិ ឃុំ មានសុវត្ថិភាព។
ទន្ទឹមនឹងនោះ តំណាងរាស្ដ្រ ឯកឧត្តមបណ្អិត ម៉ា ឈឿន បានក្រើនរម្លឹកដល់ប្រជាពលរដ្ឋ អញ្ជើញទៅបោះឆ្នោតជ្រើសរើសក្រុមប្រឹក្សាឃុំសង្កាត់ឲ្យបានគ្រប់ៗគ្នា។
ក្នុងឱកាសនោះដែរ ឯកឧត្តមបណ្អិត ម៉ា ឈឿន ក៏បានផ្ដាំផ្ញើសួរសុខទុក្ខ នឹករម្លឹកដល់ប្រជាពលរដ្ឋនៅស្រុកជើងព្រៃទាំងអស់ ពីសំណាក់ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា និងជាប្រធានគណបក្សប្រជាជនកម្ពុជាផងដែរ៕
