សម្តេចប្រធានរដ្ឋសភា កោតសរសើរលើការដឹកនាំរបស់សមាគមសិល្បករខ្មែរ អាណត្តិទី៦ ក្នុងការរៀបចំរចនាសម្ព័ន្ធច្បាស់លាស់ និងធនធានមនុស្សគ្រប់គ្រាន់

សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានលើកទឹកចិត្តដល់អ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ ដែលបានលះបង់កម្លាំងកាយចិត្ត ពេលវេលា ដឹកនាំសមាគម ដើម្បីបន្តសកម្មភាពលើកស្ទួយវិស័យសិល្បៈវប្បធម៌ ក៏ដូចជាចូលរួមក្នុងការងារទេសចរណ៍ ជាពិសេសការចូលរួមលើកកម្ពស់សីលធម៌សង្គមស្របតាមអនុសាសន៍របស់ថ្នាក់ដឹកនាំរាជរដ្ឋាភិបាលកម្ពុជា។

ក្នុងឱកាសអនុញ្ញាតឱ្យលោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ចូលជួបសម្ដែងការគួរ និងទទួលអនុសាសន៍ណែនាំ នាព្រឹកថ្ងៃទី០៨ ខែសីហា ឆ្នាំ២០២៤នេះ សម្ដេច ប្រធានរដ្ឋសភា បានកោតសរសើរពីការដឹកនាំរបស់សមាគមសិល្បករខ្មែរសម្រាប់អាណត្តិទី៦ ដែលបានរៀបចំឱ្យមាននូវរចនាសម្ព័ន្ធច្បាស់លាស់ និងធនធានមនុស្សគ្រប់គ្រាន់ ដើម្បីធានានិរន្តរភាព និងប្រសិទ្ធភាពការងាររបស់សមាគមស្របតាមទស្សនៈវិស័យ និងបេសកកម្មរបស់ខ្លួន។

សម្ដេចបានកត់សម្គាល់ឃើញថា សមាគមសិល្បករខ្មែរមានសកម្មភាពមមញឹកយ៉ាងខ្លាំង ជាពិសេសសម្ដេចពិតជាមានការកោតសរសើរ ដែលសមាគមបានប្រមូលកៀរគរធនធានមនុស្សសុទ្ធសឹងតែមានសមត្ថភាព និងមានភាពសកម្មភាព។ សម្ដេចជឿជាក់ថា សមាគមសិល្បករខ្មែរ នឹងបន្តសម្រេចបានសមិទ្ធផលថ្មីៗបន្ថែមទៀត និងទទួលបានជោគជ័យក្រោមស្មារតីនៃការរួមសាមគ្គីគ្នា។

លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ បានគោរពថ្លែងអំណរគុណជូនចំពោះសម្តេចមហារដ្ឋសភាធិការធិបតី ឃួន សុដារី ដែលបានអនុញ្ញាតដល់លោកជំទាវបានដឹកនាំប្រតិភូសមាគមសិល្បករខ្មែរបានចូលជូបសម្ដែងការគួរសមសម្ដេចប្រធានរដ្ឋសភាដោយផ្ទាល់ ព្រមទាំងទទួលអនុសាសន៍ណែនាំប្រកបដោយគុណតម្លៃនាពេលនេះ។

លោកជំទាវអ្នកឧកញ៉ា ប្រធានសមាគមសិល្បករខ្មែរ បានជម្រាបជូនសម្ដេចប្រធានរដ្ឋសភា អំពីប្រវត្តិរបស់សមាគម ត្រូវបានបង្កើតឡើងតាំងពីឆ្នាំ២០០៦ រហូតមកដល់ពេលនេះ រួមទាំងសមិទ្ធផលការងារថ្មីៗ ដែលសម្រេចបាននៅក្នុងអាណត្តិទី៦ ក្រោមការដឹកនាំរបស់លោកជំទាវអ្នកឧកញ៉ារយៈពេលជាង៣ខែមកនេះ។

ក្នុងនោះសមាគមបានរៀបចំសមាសភាពក្រុមប្រឹក្សាភិបាលដែលសុទ្ធសឹងតែជាមន្ត្រីជាន់ខ្ពស់អញ្ជើញមកពីអន្តរវិស័យ, គណៈប្រតិបត្តិ និងក្រុមការងារសមាគម,ការកែសម្រួលលក្ខន្តិកៈសមាគម ដើម្បីលើកកម្ពស់ប្រសិទ្ធភាពការងារ, ការប្រមូលកៀរគរធនធានមនុស្ស និងធនធានថវិកាពីវិស័យឯកជន ដើម្បីចូលរួមគាំទ្រដល់សកម្មភាពលើកកម្ពស់វិស័យសិល្បៈវប្បធម៌ជាតិ។

ដោយឡែកចំពោះសកម្មភាពវិញ សមាគមបានរៀបចំ និងចូលរួមរៀបចំព្រឹត្តិការសង្គម និងវប្បធម៌ជាច្រើនរួចមកហើយ ហើយថ្មីៗនេះក៏បានដឹកនាំសិល្បករ-សិល្បការិនី ប្រមាណ២០០នាក់ ចូលរួមអបអរសាទរមហាព្រឹត្តិការណ៍បើកការដ្ឋានសាងសង់ “ព្រែកជីកហ្វូណតេជោ” ផងដែរ រួមទាំងសកម្មភាពសប្បុរសធម៌ជួយសម្រួលដល់ជីវភាពសិល្បករចាស់ជរា និងបាត់បង់សមត្ថភាពក្នុងការសម្តែង ត្រូវបានអនុវត្តជាបន្តបន្ទាប់។

ក្រៅអំពីនេះលោកជំទាវអ្នកឧកញ៉ាប្រធានសមាគម ក៏បានជម្រាបជូនពីផែនការសកម្មភាពនានាជាបន្តបន្ទាប់របស់សមាគមក្នុងការចូលរួមលើកកម្ពស់វិស័យសិល្បៈវប្បធម៌ជាតិ ផ្សារភ្ជាប់នឹងវិស័យទេសចរណ៍ផងដែរ។ ជាក់ស្ដែង ដើម្បីជំរុញនូវយុទ្ធនាការ «ទស្សនាសៀមរាប ឆ្នាំ២០២៤» ដែលបានដាក់ចេញដោយសម្ដេចធិបតីនាយករដ្ឋមន្ត្រី សមាគមសិល្បករខ្មែរ បានសហការជាមួយរដ្ឋបាលខេត្តសៀមរាបរៀបចំព្រឹត្តិការណ៍ «ស្នាមញញឹមនៃកម្ពុជា» ចាប់ពីថ្ងៃទី១២ ដល់ថ្ងៃទី១៦ ខែសីហា ឆ្នាំ២០២៤ ខាងមុខនេះ ដើម្បីផ្សព្វផ្សាយវប្បធម៌ដល់ទេសចរណ៍​ និងជាការទាក់ទាញភ្ញៀវទេសចរអន្តរជាតិមកទស្សនាផងដែរ។

ក្នុងនាមថ្នាក់ដឹកនាំ និងសមាជិកសមាជិកា សមាគមសិល្បករខ្មែរ លោកជំទាវអ្នកឧកញ៉ាបានបង្ហាញឆន្ទៈប្រកបដោយការប្តេជ្ញាចិត្តយ៉ាងមុតមាំក្នុងការជួយជំរុញលើកស្ទួយ អភិរក្ស និងអភិវឌ្ឍវិស័យសិល្បៈវប្បធម៌ខ្មែរដ៏ល្អផូរផង់ ឱ្យកាន់តែមានកិត្យានុភាពបន្ថែមទៀតទាំងលើឆាកជាតិ និងអន្តរជាតិ ក្រោមម្លប់ដ៏ត្រជាក់នៃ អង្គព្រះមហាក្សត្រ ព្រះករុណា ព្រះបាទសម្តេចព្រះបរមនាថ នរោត្តម សីហមុនី និងក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជានាពេលបច្ចុប្បន្ន៕