(ព្រះសីហនុ)៖ ឯកឧត្តម ឡុង ឌីម៉ង់ អភិបាលរងខេត្តព្រះសីហនុ បាទបញ្ជាក់ប្រាប់អ្នកសារព័ត៌មានថា ក្រុងកោះរ៉ុង ជាគ្រាប់ពេជ្ររបស់ខេត្តព្រះសីហនុ ដោយភ្ញៀវទេសចរណ៍ជាតិ និងអន្តរជាតិមិនដែលរំលង។
ឯកឧត្តម ឡុង ឌីម៉ង់ បានធ្វើឡើងក្នុងដំណើរបំពេញបេសកកម្មរបស់អ្នកសារព័ត៌មានជាតិ និងអន្តរជាតិជាង៦០រូប ដឹកនាំដោយក្លិបអ្នកកាសែតកម្ពុជា ដែលមានលោក ពុយ គា ជាប្រធានដឹកនាំផ្ទាល់ ដើម្បីចុះផលិតនិងផ្សព្វផ្សាយព័ត៌មានក្នុងខេត្តព្រះសីហនុ រយៈពេល៤ថ្ងៃ ចាប់ពីថ្ងៃទី១៥ ដល់ ១៨ ខែធ្នូ ឆ្នាំ២០២៤។
ឯកឧត្តម ឡុង ឌីម៉ង់ បានឲ្យដឹងថា ក្រុងកោះរ៉ុង ជាទីប្រជុំកោះ ហើយត្រូវបានចែកចេញជាពីសង្កាត់ គឺសង្កាត់កោះរ៉ុង និងសង្កាត់កោះរ៉ុងសន្លឹម ដែលមានធនធានធម្មជាតិដ៏ស្រស់បំព្រង ព្រៃកោងកាង ឆ្នេរសមុទ្រដ៏ស្រស់ស្អាត ដែលបានទាក់ចិត្តភ្ញៀវទេសចរជាតិ និងអន្តរជាតិជាច្រើន។
ឯកឧត្តមបានបន្តថា ក្រុងកោះរ៉ុង ជាគ្រាប់ពេជ្ររបស់ខេត្តព្រះសីហនុ ភាគច្រើនភ្ញៀវទេសចរប៉ែកអឺរ៉ុបចូលចិត្តមកកម្សាន្ត មានទាំងផាសុកភាព មានសន្តិសុខ ភាពស្ងប់ស្ងាត់ ដែលធ្វើឱ្យភ្ញៀវទេសចរអាចមកលេងបាន៕