(កំពង់ធំ)៖ ក្នុងឋានៈជាបេសកជនពិសេសរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកប្រាសាទបល្ល័ង្ក ខេត្តកំពង់ធំ លោកអ្នកឧកញ៉ា បណ្ឌិត ទ្រី ភាព តែងតែផ្សារភ្ជាប់សុខទុក្ខជានិច្ចជាមួយបងប្អូនប្រជាពលរដ្ឋក្នុងស្រុកប្រាសាទបល្ល័ង្ក ហើយតែងមានកម្មវិធីជំនួបសំណេះសំណាល សួរសុខទុក្ខ និងនាំយកអំណោយជូនដល់ប្រជាពលរដ្ឋ ដើម្បីដោះស្រាយការលំបាកនានាផងដែរ។
នៅព្រឹកថ្ងៃពុធ ទី២៧ ខែសីហា ឆ្នាំ២០២៥នេះ លោកអ្នកឧកញ៉ា បណ្ឌិត ទ្រី ភាព មានកម្មវិធីចំនួនពីរដាច់ដោយឡែកពីរគ្នានៅក្នុងស្រុកប្រាសាទបាល្ល័ង្ក។ កម្មវិធីទី១ ជួបសំណេះសំណាលផ្តល់កម្លាំងចិត្តដល់សិស្សត្រៀមប្រលងមធ្យមសិក្សាទុតិយភូមិ ហៅបាក់ឌុប ចំនួន ២៤១នាក់ និងកម្មវិធីទី២ ជួបសំណេះសំណាល និងនាំំយកអំណោយរបស់សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ជូនដល់ពលករខ្មែរ ដែលទើបត្រឡប់មកពីប្រទេសថៃចំនួន ៨៥០គ្រួសារ។
ក្នុងជំនួបជាមួយសិស្សត្រៀមប្រលងបាក់ឌុប លោកអ្នកឧកញ៉ា បណ្ឌិត ទ្រី ភាព បានកោតសរសើរក្មួយៗទាំង២៤១នាក់ ដែលបានប្រឹងប្រែងសិក្សារៀនសូត្រតាំងពីថ្នាក់បឋមសិក្សា រហូតដល់បានប្រឡងមធ្យមសិក្សាទុតិយភូមិ។ លោកអ្នកឧកញ៉ា បានជម្រាបក្មួយៗថា ការសិក្សារៀនសូត្រមានគុណតម្លៃធំធេងណាស់។ ការសិក្សារៀនសូត្រជួយផ្តល់ចំណេះដឹង និងជួយធ្វើឱ្យជីវិតបានល្អប្រសើរ ហើយអាចជួយឱ្យកសាងប្រទេសឱ្យបានកាន់តែល្អប្រសើរ។
លោកអ្នកឧកញ៉ា បានណែនាំដល់សិស្សត្រៀមប្រលងទាំងអស់ ឱ្យតាំងស្មារតី ហើយខិតខំបំពេញវិញ្ញាសារ ឱ្យអស់ពីសមត្ថភាព ដើម្បីទទួលជោគជ័យឈានទៅបន្តការសិក្សាថ្នាក់បរិញ្ញាបត្របន្តទៀត។
ជាការលើកទឹកចិត្តបន្ថែម លោកអ្នកឧកញ៉ា បានឧបត្ថម្ភដល់សិស្សទាំង ២៤១ នាក់នេះផងដែរ។ ក្នុងម្នាក់ៗទទួលបានថវិកា ១០០,០០០រៀល និងលោកគ្រូ-អ្នកគ្រូ ១០នាក់ ក្នុងម្នាក់ៗ ១៥០,០០០រៀល។
បន្ទាប់ពីបញ្ចប់កិច្ចសំណេះសំណាលជាមួយសិស្សត្រៀមប្រលងបាក់ឌុប លោកអ្នកឧកញ៉ា បន្តដំណើរអញ្ជើញទៅឃុំក្រយា ដើម្បីសួរសុខទុក្ខពលករខ្មែរទើបត្រឡប់មកពីប្រទេសថៃ ៨៥០គ្រួសារ និងនិមន្តព្រះសង្ឃសូត្រមន្តបង្សុកូល ឧទ្ទិសកុសលដល់ឌួងវិញ្ញាក្ខន្ធវីរកងទ័ព ដែលបានពលីជីវិតទឹកដីពីការឈ្លានពានរបស់ទ័ពសៀមផងដែរ។
ក្នុងជំនួបនេះ លោកអ្នកឧកញ៉ា បានលើកបង្ហាញពីការយកចិត្តទុកដាក់ និងគិតគូររបស់សម្តេចតេជោ សម្តេចកិត្តិព្រឹទ្ធបណ្ឌិត សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ចំពោះបងប្អូនខ្មែរដែលទើបត្រឡប់មកពីប្រទេសថៃ តាមរយៈការណែនាំអាជ្ញាធរ ក្រុមការងារផ្តល់នូវអំណោយនានា ដើម្បីដោះស្រាយការលំបាកចំពោះមុខ និងស្វះស្វែងរកការងារជូន ដើម្បីបានប្រាក់ចំណូលទ្រទ្រង់ជីវភាព។
លោកអ្នកឧកញ៉ា បានគូសរំលេចថា ឱកាសការងារក្នុងស្រុកឥឡូវនេះមានច្រើនណាស់ ដូច្នេះបងប្អូនមិនចាំបាច់ទៅបម្រើការងារនៅប្រទេសសៀមទៀតទេ ហើយសូមទុកចិត្តលើរាជរដ្ឋាភិបាលចំពោះការដោះស្រាយបញ្ហាទាំងឡាយដែលកើតចេញពីការឈ្លានពានរបស់សៀម។
ដើម្បីចូលរួមចំណែក្នុងការជួយសម្រាលបន្ទុកដល់បងប្អូនពលករមួយរយៈពេលខ្លី លោកអ្នកឧកញ៉ា បាននាំយកនូវអំណោយមួយចំនួនមកចែកជូនបងប្អូនពលករគ្រប់គ្រួសារ ដែលក្នុងមួយគ្រួសារទទួលបាន អង្ករ ២០គ.ក្រ មីជាតិ ១កេស ទឹកត្រី ១យួរ ទឹកស៊ីអ៉ីវ ១យួរ ត្រីខេ ១យួរ និងថវិកាចំនួន ១០០,០០០រៀល។
សូមបញ្ជាក់ផងដែរថា ពិធីជួបសំណេះសំណាលជាមួយសិស្សប្រឡងសញ្ញាបត្រមធ្យមសិក្សាទុតិយភូមិ និងចុះសួរសុខទុក្ខពលករវិលមកពីប្រទេសថៃខាងលើនេះ ចំណាយថវិកាអស់ ៣១៦លានរៀល៕
