ឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំ អញ្ជើញជួបសំណេះសំណាលជាមួយបងប្អូនប្រជាពលរដ្ឋ និងពិនិត្យការដ្ឋានសាងសង់ផ្លូវកៅស៊ូប្រភេទ DBST ប្រវែង ១១,៤ គីឡូម៉ែត្រ តភ្ជាប់ពីភូមិចំបក់ជ្រុំ ឃុំប្រាសាទ ទៅភូមិផ្លុង ឃុំទីពោ ស្រុកសន្ទុក ខេត្តកំពង់ធំ នាព្រឹកថ្ងៃទី២៧ ខែសីហា ឆ្នាំ២០២៥។ ជាមួយគ្នានោះដែរ ឯកឧត្តម នួន ផារ័ត្ន បានលើកឡើងនូវព្រឹត្តិការណ៍ប្រទសជាតិ នៅតាមព្រំដែន កម្ពុជា-ថៃ សូមឱ្យបងប្អូនមានភាពជឿជាក់លើថ្នាក់ដឹកនាំ ក្នុងការដោះស្រាយបញ្ហាព្រំដែននេះ។
លើសពីនេះទៀត ឯកឧត្តម បន្តថា ផ្លូវ ស្ពាន គឺជាសរសៃឈាមនៃសេដ្ឋកិច្ចជាតិ និងគ្រួសារ ដូច្នេះមានផ្លូវ គឺមានក្តីសង្ឃឹម ហើយការធ្វើផ្លូវ១ខ្សែនេះ គឺពិតជាបានបំពេញនូវសេចក្តីត្រូវការរបស់បងប្អូនប្រជាពលរដ្ឋ ធ្វើយ៉ាងណាដើម្បីលើកស្ទួយកម្ពស់ជីវភាពរបស់ប្រជាពលរដ្ឋ ក៏ដូចជាលើកកម្ពស់ការអភិវឌ្ឍសេដ្ឋកិច្ចរបស់ខេត្ត ក៏ដូចជាក្នុងប្រទេសកម្ពុជាផងដែរ។
ឯកឧត្តមអភិបាលខេត្តកំពង់ធំ បន្តទៀតថា ខេត្តកំពង់ធំ ជាខេត្តដែលស្ថិតនៅចំកណ្តាលប្រទេស ហើយក៏ជាខេត្តដែលមានសក្តានុពលលើសវិស័យកសិកម្ម ។
ឯកឧត្តមបញ្ជាក់ទៀតថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្ឮ្រី នៃព្រះរាជាណាចក្រកម្ពុជា បានយកចិត្តទុកដាក់លើវិស័យកសិកម្មក្នុងខេត្តកំពង់ធំ នឹងប្រែក្លាយកសិកម្មជាលក្ខណៈគ្រួសារ ឱ្យទៅជាសហគមន៍កសិកម្មទំនើប ។ ក្នុងនោះ ដំណាំស្វាយចន្ទី ខណៈដែលខេត្តកំពង់ធំ គឺជាស្នូលនៃគោលនយោបាយរបស់សម្តេចធិបតីនាយករដ្ឋមន្ត្រីនៃកម្ពុជា ក្នុងការប្រែក្លាយកម្ពុជាទៅជាអធិរាជស្វាយចន្ទី។
លើសពីនេះទៀត ប្រមុខរាជរដ្ឋាភិបាលបានខិតខំប្រឹងប្រែងដោះស្រាយនូវរាល់ការលំបាក និងសំណូមពររបស់ប្រជាពលរដ្ឋ ព្រមទាំងបានខិតខំកសាងអភិវឌ្ឍន៍ ប្រទេសជាតិឱ្យមានការរីកចម្រើនលើគ្រប់វិស័យ ជាពិសេសការកសាងហេដ្ឋារចនាសម័ន្ធរូបវ័ន្តនានា ដូចជា៖ ផ្លូវ ស្ពាន សាលារៀន មន្ទីរពេទ្យ ប្រព័ន្ធធារាស្រ្ត គ្រប់ទីកន្លែង។ ឯកឧត្តម នួន ផារ័ត្ន ក៏បានផ្តាំផ្ញើដល់បងប្អូនប្រជាពលរដ្ឋដែលប្រើប្រាស់ផ្លូវនេះ សូមចូលរួមជួយថែរក្សា ដើម្បីធានាឱ្យការប្រើប្រាស់បានយូរអង្វែង។
