ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ នារសៀលថ្ងៃទី២៩ ខែវិច្ឆិកា ឆ្នាំ២០១៧ បានអនុញ្ញាតិឲ្យប្រតិភូអគ្គនាយកដ្ឋានផ្សព្វផ្សាយ ក្រសួងមហាផ្ទៃ ដឹកនាំដោយឯកឧត្តម ឧត្តមសេនីយ៍ឯក គង់ ចន្ធី អគ្គនាយករង នៃអគ្គនាយកដ្ឋានភស្តុភារនិងហិរញ្ញវត្ថុ ក្រសួងមហាផ្ទៃ ចូលជួបសម្តែងការគួរសម និងពិភាក្សាការងារ ជុំវិញការទំនាក់ទំនងផ្តល់ព័ត៌មាន សម្រាប់ការផ្សព្វផ្សាយតាមប្រព័ន្ធបច្ចេកទេសវិទ្យាឥតខ្សែ បែបឌីជីថលទំនើប ឬទូរស័ព្ទចល័ត និងតាមប្រព័ន្ធផ្កាយរណបស្តង់ដារអន្តរជាតិ ជូនស្ថានីយ៍វិទ្យុ និងទូរទស្សន៍ក្រសួងមហាផ្ទៃ។
ក្នុងជំនួបពិភាក្សាគ្នានោះ ត្រូវបានធ្វើឡើងនៅសាលប្រជុំសាលាខេត្តពោធិ៍សាត់ បន្ទាប់ពីឯកឧត្តមអភិបាលខេត្ត អញ្ជើញត្រឡប់មកពីដោះស្រាយទំនាស់ដីធ្លី និងដោះស្រាយវិវាទ ទាំង៨ករណីផ្សេងគ្នា នៅស្រុកបាកាន។
គួរបញ្ជាក់ថា ថ្មីៗនេះក្រសួងមហាផ្ទៃ បានបង្កើតស្ថានីយ៍វិទ្យុ និងទូរទស្សន៍ ដើម្បីធ្វើការផ្សព្វផ្សាយព័ត៌មានជាតិ អន្តរជាតិ ព័ត៌មានទាន់ហេតុការណ៍ សន្តិសុខសង្គម សេដ្ឋកិច្ច ពាណិជ្ជកម្ម នយោបាយ និងការអប់រំច្បាប់ជាដើម សម្រាប់ឲ្យទស្សនិកជន ទាំងក្នុង និងក្រៅប្រទេស ទូទាំងពិភពលោក បានទស្សនាតាមកាណាល់ប៉ុសិ៍្តលេខ៦១ និងវិទ្យុ FM លេខ ៩០.២៥មេហ្គាហឺត ក្នុងគោលបំណងបង្កើនម៉ោងផ្សព្វផ្សាយកម្មវិធីទូរទស្សន៍ឈ្មោះថា នាទីសន្តិសុខមាតុភូមិ ដែលត្រូវបានដាក់ផ្សាយតាមបណ្តាទូរទស្សន៍ក្នុងស្រុកនានា អស់រយៈពេលជាង ២០ឆ្នាំ កន្លងមកហើយ៕
