នៅថ្ងៃអង្គារ ១៣កើត ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី ២៧ ខែកុម្ភៈ ឆ្នាំ ២០១៨ ឯកឧត្តម ថោ ជេដ្ឋា រដ្ឋលេខាធិការ ក្រសួងធនធានទឹក និងឧតុនិយម និងជាសហប្រធានកម្មវិធីខ្សែសង្វាក់តម្លៃផលិតកម្មកសិកម្មកម្ពុជា ជំហានទី ២ បានចុះត្រួតពិនិត្យការស្តារឡើងវិញប្រព័ន្ធធារាសាស្រ្ត ចារ១ ស្ថិតក្នុងស្រុកព្រៃកប្បាស ខេត្តតាកែវ ដែលមានលទ្ធភាពស្រោចស្រពលើផ្ទៃដីចំនួន ១.២៣៧ហិកតា និងប្រព័ន្ធធារាសាស្រ្ត ចារ ២ ស្ថិតក្នុងស្រុកស្អាង ខេត្តកណ្តាល មានលទ្ធភាពស្រោចស្រពលើផ្ទៃដីចំនួន ១.០០៤ហិកតា ។ នៅក្នុងដំណើរបេសកកម្មនោះដែរ ឯកឧត្តមរដ្ឋលេខាធិការ ក៏បានឆ្លៀតបន្តដំណើរទៅត្រួតពិនិត្យ និងសួរសុខទុក្ខសហគមន៍កសិករប្រើប្រាស់ទឹក វត្តធម្មវិន័យ ស្ថិតក្នុងស្រុកព្រៃកប្បាស ខេត្តតាកែវ ផងដែរ ខណៈសហគមន៍នេះ បាននឹងកំពុងដំណើរការបោះឆ្នោតជ្រើសតាំងគណៈកម្មាធិការសហគមន៍អាណត្តិថ្មី សម្រាប់ការគ្រប់គ្រងប្រព័ន្ធធារាសាស្រ្ត វត្តថ្មី ដែលមានលទ្ធភាពស្រោចស្រពលើផ្ទៃដីជាង ២.០០០ហិកតា ។
