រាជធានីភ្នំពេញ ៖ កិច្ចប្រជុំពិគ្រោះយោបល់លើសេចក្ដីព្រាងគោលនយោបាយជាតិស្ដីពី “ការសិក្សាពេញមួយជីវិត” ត្រូវបានរៀបចំឡើងក្នុងគោលដៅលើកកម្ពស់ការរស់នៅរបស់ប្រជាជនកម្ពុជាគ្រប់រូប ដើម្បីទទួលបានឱកាសសិក្សាពេញមួយជីវិតក្នុងគ្រប់បរិបទ និងគ្រប់ទីកន្លែង ដើម្បីអភិវឌ្ឍចំណេះដឹងទូទៅ ជំនាញវិជ្ជាជីវៈ និងដើម្បីគុណតម្លៃសម្រាប់សុខដុមជីវិត ដែលត្រូវបានរៀបចំឡើងក្រោមអធិបតីភាពឯកឧត្ដមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា គាំទ្រដោយអង្គការយូណេស្កូប្រចាំកម្ពុជា នាព្រឹកថ្ងៃចន្ទ ៤រោច ខែផល្គុន ឆ្នាំរកា នព្វស័ក ព.ស. ២៥៦១ នៅសណ្ឋាគារកាំបូឌីយ៉ាណា រាជធានីភ្នំពេញ៕
ក្នុងឱកាសនោះឯកឧត្ដមបណ្ឌិតសភាចារ្យរដ្ឋមន្ត្រី បានលើកឡើងថា “ការសិក្សាមួយជីវិតដើម្បីទទួលបាន វិជ្ជាសម្បទា បំណិនសម្បទា ចរិយាសម្បទា និងគុណសម្បទា សំដៅរួមរស់នៅជាមួយគ្នា ក្នុងសុខសន្តិភាពប្រកបដោយសុខដុមរមនា មានន័យថា ជាការសិក្សាដែលមានវិសាលភាពគ្របដណ្ដប់ ការសិក្សារបស់ពលរដ្ឋគ្រប់រូប គ្រប់វ័យ ទាំងការអប់រំក្នុងប្រព័ន្ធ ក្រៅប្រព័ន្ធ និងមិនផ្លូវការ ទាំងក្នុងសាលា គ្រួសារ សហគមន៍ ការិយាល័យធ្វើការ កន្លែងកម្សាន្ត និងទីតាំងវប្បធម៌ និងសាសនា”។