នៅទីស្តីការក្រសួងបរិស្ថាន នារសៀលថ្ងៃទី២ ខែមេសា ឆ្នាំ២០១៨ ឯកឧត្តម សាយ សំអាល់ រដ្ឋមន្រ្តីក្រសួងបានជួបសំណេះសំណាល និងចែកលិខិតថ្លែងអំណរគុណដល់មន្រ្តី និងយុវជនអន្តរក្រសួង-ស្ថាប័ន ក្រុមការងារស.ស.យ.ក.វិស័យបរិស្ថាន ដែលទើបតែបញ្ចប់ទស្សនកិច្ចសិក្សា នៅសហគមន៍ព្រែកស្វាយ ក្នុងឧទ្យានជាតិសមុទ្រកោះរ៉ុង ខេត្តព្រះសីហនុ។
ឯកឧត្តមរដ្ឋមន្រ្តី សាយ សំអាល់ បានលើកទឹកចិត្ត និងជំរុញដល់យុវជនឱ្យមានការចូលរួម គ្រប់សកម្មភាព ទាំងក្នុងវិស័យបរិស្ថាន និងអភិវឌ្ឍន៍នៅក្នុងសង្គម ក៏ដូចជាការកសាងនូវ ទំនុកចិត្តដល់អ្នកពាក់ព័ន្ធ ក្នុងកិច្ចការពារក្នុងតំបន់ការពារធម្មជាតិផងដែរ។ ជាមួយគ្នានេះ ឯកឧត្តមរដ្ឋមន្រ្តី បានបន្តថា បច្ចុប្បន្នក្រសួងបរិស្ថាន បានធ្វើទំនើបកម្មស្ថាប័ន ទន្ទឹមនឹងនេះ ក៏ទាមទារដល់មន្រ្តី និងយុវជនធ្វើទំនើបកម្មខ្លួនឯង ធ្វើយ៉ាងណាដើម្បីកសាងសមត្ថភាព ខ្លួនឯងឱ្យការអនុវត្តការការងារក្នុងស្ថាប័នឱ្យមានប្រសិទ្ធភាព។
សូមបញ្ជាក់ថា ទស្សនកិច្ចសិក្សានៅសហគមន៍ព្រែកស្វាយ ក្នុងឧទ្យានជាតិសមុទ្រកោះរ៉ុង ខេត្តព្រះសីហនុ រៀបចំឡើងកាលពីថ្ងៃទី១៥-១៧ ខែមីនា ឆ្នាំ២០១៨ កន្លងទៅ ដើម្បីផ្សាភ្ជាប់យុវជនអន្តរក្រសួង-ស្ថាប័ន ទៅនឹងការងារបរិស្ថាន ធន ធានធម្មជាតិ ជីវៈ ចម្រុះបាតសមុទ្រ ជំរុញទេសចរណ៍ធម្មជាតិនៅក្នុងតំបន់ ឱ្យការរស់នៅ របស់ប្រជាសហគមន៍មូលដ្ឋានប្រកបដោយនិរន្តរភាព។ ទស្សនកិច្ចសិក្សានេះ បានជម្រុញឱ្យយុវជនទាំងអស់បានស្វែងយល់ ពីតម្លៃនៃសន្តិភាព ស្ថេរភាពនយោបាយ ការខិតខំប្រឹងប្រែងរបស់ក្រសួងបរិស្ថាន ជំរុញ សកម្មភាពចូលរួមក្នុងកិច្ចគាំពារបរិស្ថានផងដែរ៕
