នាព្រឹកថ្ងៃចន្ទ ១កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២១ ខែមករា ឆ្នាំ២០១៩ គណៈប្រតិភូក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអានប្រធានក្រុមសមាជិកាព្រឹទ្ធសភា និងជាប្រធានគណៈកម្មការទី៨ព្រឹទ្ធសភា បានអញ្ជើញចុះជួបសំណេះសំណាល សួរសុខទុក្ខកុមារកំព្រា នៅមណ្ឌលអង្គភាពបណ្តុះបណ្តាល និងថែរក្សាកុមារកំព្រា ដែលស្ថិតនៅក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ដោយមានការចូលរួមអមដំណើរពីមន្ត្រីរាជការនៃអគ្គលេខាធិការដ្ឋានព្រឹទ្ធសភាផងដែរ។
ក្នុងឱកាសនោះដែរ គណៈប្រតិភូក្រុមសមាជិកាព្រឹទ្ធសភា ក៏បាននាំយកអំណោយរបស់សម្តេចវិបុលសេនាភក្តី សាយ ឈ៉ំ ប្រធានព្រឹទ្ធសភា ព្រមទាំងអំណោយក្រុមសមាជិកាព្រឹទ្ធសភា ផ្តល់ជូនដល់មណ្ឌលអង្គភាពបណ្តុះបណ្តាល និងថែរក្សាកុមារកំព្រា ដែលរួមមាន÷ សម្ភារសិក្សា ថ្នាំដុសធ្មេញ សាប៊ូដុសខ្លួន កន្សែងពោះគោ ទឹកអូអ៉ីឈី ទឹកដោះគោ ព្រមទាំងនំផ្សេងៗទៀត។ ជាមួយគ្នានេះដែរ ក៏បានឧបត្ថម្ភដល់មណ្ឌលអង្គភាពបណ្តុះបណ្តាល និងថែរក្សាកុមារកំព្រា រួមមាន÷ ប្រេងឆា២០លីត្រ ប៊ីចេង០៥គីឡូក្រាម ទឹកត្រី០២កេសធំ ទឹកស៊ីអ៉ីវ០២កេសធំ មីយើងចំនួន៥កេស ព្រមទាំងអង្ករចំនួន០១តោន ថ្នាំពេទ្យ២កេស និងថវិកាមួយចំនួនផងដែរ។