នៅព្រឹកថ្ងៃទី២១ ខែធ្នូ ឆ្នាំ២០២០ លោកជំទាវ ម៉ាណ ណាវី តំណាងរាស្រ្តមណ្ឌលរាជធានីភ្នំពេញ និងជាប្រធានក្រុមការងារចុះជួយសង្កាត់ច្រាំងចំេរះ១ ខណ្ឌឬស្សីកែវ បានអញ្ជើញប្រគល់ម៉ូតូកង់បីជូនប្រជាពលរដ្ឋ ងាយរងគ្រោះចំនួន១៥គ្រួសារ ដែលមកពីបណ្ដាខេត្តមួយចំនួន រួមមាន ខេត្តកោះកុង ០៥គ្រួសារ ខេត្តសៀមរាប ០៥គ្រួសារ ខេត្តកំពត ០៣គ្រួសារ ខេត្តព្រៃវែង ០១ គ្រួសារ និងខេត្តកណ្តាល ០១ គ្រួសារ ។
ការប្រគល់នេះបានធ្វើនៅក្នុងបរិវេណវិហារធំគីឡូម៉ែត្រលេខ៩ ដែលស្ថិតនៅភូមិ៣ សង្កាត់ច្រាំងចំេរះ១ ខណ្ឌឫស្សីកែវ រាជធានីភ្នំពេញ ។
លោក ណុសរ៍ ហាសាន់ តំណាងអោយសមាគមរ៉ស់ម៉ា ប្រទេសកូវ៉ែត ប្រចាំនៅកម្ពុជា បានលើកឡើងថា ជំនួយដែលផ្តល់ជូននៅពេលនេះមិនមែនជាជំនួយក្នុងរយៈពេលខ្លីនោះទេ គឺជាជំនួយមុខរបរយូរអង្វែងសម្រាប់បងប្អូនរកចំណូលចិញ្ចើមគ្រួសារ ។ លោក ណុសរ៍ ហាសាន់ បានបន្តថា មុននឹងយេីងផ្ដល់ជំនួយទៅកាន់បងប្អូនយើងបានចុះត្រួតពិនិត្យពីស្ថានភាពគ្រួសាររបស់ពួកគាត់ហើយបានផ្ដល់ជូនតាមតំរូវការដែលពួកគាត់ខ្វះខាត ។ ជាមួយនេះលោក ណុសរ៍ ហាសាន់ ក៏បានថ្លែងអំណរគុណដល់រាជរដ្ឋាភិបាលកម្ពុជា ដែលសហការយ៉ាងល្អក្នុងការយកជំនួយមកកាន់បងប្អូនប្រជាពលរដ្ឋកម្ពុជា ។
ក្នុងឱកាសនោះដែរ លោកជំទាវ ម៉ាណ ណាវី បានមានប្រសាសន៍ផ្ដាំផ្ញើឲ្យបងប្អូនប្រជាពលរដ្ឋ ត្រូវចេះយកចិត្តទុកដាក់ថែរក្សានូវរបស់ដែលគេបានប្រគល់ជូននៅពេលនេះ ព្រោះនេះជាមុខរបរយូរអង្វែងសម្រាប់បងប្អូនក្នុងការលេីកកម្ពស់ជីវភាពបានមួយកម្រិតទៀត ។ លោលោកជំទាវបានបញ្ជាក់ថាក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានយកចិត្តទុកដាក់អំពីសុវត្ថិភាពសុខមាលភាពដល់ប្រជាពលរដ្ឋទូទៅ មិនថាប្រជាពលរដ្ឋកាន់សាសនាអ្វីនោះឡើយ ដូចជាពេលនេះយើងទទួលបានជំនួយពីសប្បុរសជនប្រទេសកូវ៉ែត តាមរយៈសមាគមសម្របសម្រួល និងអភិវឌ្ឍន៍ គឺដោយសារប្រទេសយើងមានសន្តិភាព ។ ជាមួយនេះលោកជំទាវ ក៏បានថ្លែងអំណរគុណដល់លោក ណុសរ៍ ហាសាន់ តំណាងអោយសមាគមរ៉ស់ម៉ា ប្រទេសកូវ៉ែត ប្រចាំនៅកម្ពុជា និងរាជរដ្ឋាភិបាលប្រទេសកូរ៉ែត ដែលតែងតែផ្ដល់នូវជំនួយជាច្រើនមកកាន់បងប្អូនប្រជាពលរដ្ឋកម្ពុជា ។
