ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានថ្លែងថា សម្លឆ្ងាញ់ដោយសារតែចុងភៅជាអ្នកចេះរៀបចំគ្រឿង ឯដំណឹងល្អដោយសារតែអ្នកនាំពាក្យចេះរៀបចំការឆ្លើយតបបានល្អ។
ឯកឧត្តមថ្លែងបែបនេះ ក្នុងឱកាសជាអធិបតីបិទកិច្ចប្រជុំផ្សព្វផ្សាយស្ដីពី «ព័ត៌មានជាអំណាច នាយុគសម័យឌីជីថល» ដល់នាំពាក្យក្រសួង-ស្ថាប័ន និងរាជធានី-ខេត្ត នៅរសៀលថ្ងៃទី០២ ខែឧសភា ឆ្នាំ២០២២ ដែលរៀបចំដោយអង្គភាពអ្នកនាំពាក្យរាជរដ្ឋាភិបាល និងក្រសួងបរិស្ថាន។
ឯកឧត្តម ខៀវ កាញារីទ្ធ បានបញ្ជាក់យ៉ាងដូច្នេះថា «ចុងភៅទាល់តែមានគ្រឿងគ្រប់បានគេស្ល ហើយស្លឆ្ងាញ់មិនឆ្ងាញ់លើដៃចុងភៅ ដំណឹងល្អ ឬអាក្រក់ លើអ្នកនាំពាក្យ មន្ត្រីព័ត៌មាន»។
ក្នុងន័យនេះ ឯកឧត្តមរដ្ឋមន្ត្រីក្រសួងព័ត៌មាន ចង់ប្រាប់ដល់អ្នកនាំពាក្យ និងមន្ត្រីព័ត៌មានទាំងអស់ ត្រូវចេះឆ្លើយតបបញ្ហាឲ្យបានទាន់ពេលវេលា ក៏ដូចជាត្រៀមខ្លួនជាស្រេច និងដឹងព័ត៌មានគ្រប់ជ្រុងជ្រោយ ក្នុងការផ្តល់ព័ត៌មាន។ លោកបន្តថា នាយុគសម័យឌីជីថល គឺជាបរិបទថ្មី ដែលទាមទារឲ្យអ្នកនាំពាក្យ និងមន្ត្រីព័ត៌មាន ប្រឹងប្រែងកាន់តែខ្លាំងថែមទៀត។
កិច្ចប្រជុំស្ដីពី «ព័ត៌មានជាអំណាច នាយុគសម័យឌីជីថល» ប្រព្រឹត្តទៅរយៈពេល ១ថ្ងៃពេញ មានគោលបំណងស្នូល ក្នុងការចែករំលែកនូវទស្សនទាន យន្ដការ និងយុទ្ធសាស្រ្ដរួមដែលជាមូលដ្ឋានគ្រឹះ នៃវិស័យព័ត៌មានរបស់រដ្ឋ ក្នុងទិសដៅកសាងឲ្យបាននូវអភិបាលកិច្ចល្អលើវិស័យព័ត៌មានថ្នាក់ជាតិ និងថ្នាក់ក្រោមជាតិ ដើម្បីជំរុញប្រសិទ្ធភាពនៃការផ្សព្វផ្សាយ បំផុសព័ត៌មានឲ្យចូលទៅកៀកប្រជាពលរដ្ឋ ដើម្បីផលប្រយោជន៍នៃមតិសាធារណៈ។
ឯកឧត្តម ផៃ ស៉ីផាន រដ្ឋមន្ដ្រីប្រតិភូអមនាយករដ្ឋមន្ដ្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានថ្លែងដែរថា ក្រោយការជជែកពិភាក្សាតាមរយៈអង្គសិក្ខាសាលា លោកបានកត់សម្គាល់នូវស្ថានភាពជារួមនៃបញ្ហាប្រឈម និងកង្វះខាតប្រសិទ្ធភាពនៅក្នុងយន្ដការនេះ គឺកិច្ចសហការរវាងមន្រ្ដីព័ត៌មាន និងមន្រ្ដីនៃមន្ទីរវិស័យជំនាញថ្នាក់ក្រោមជាតិ ពុំទាន់មានភាពជិតស្និទ និងស៉ីសង្វាក់គ្នានៅឡើយ ដែលជាឧបសគ្គរាំងស្ទះដល់អ្នកនាំពាក្យ ឬមន្រ្ដីព័ត៌មាន ក្នុងការប្រមូល និងផ្សព្វផ្សាយព័ត៌មានឱ្យបានទូលំទូលាយ និងទាន់ពេលវេលា។
ក្នុងន័យនេះ ឯកឧត្តមបានសំណូមពរដល់ រដ្ឋមន្រ្ដីព័ត៌មាន ក៏ដូចជាអ្នកនាំពាក្យថ្នាក់ជាតិ (ជាថ្នាក់ដឹកនាំជិតស្និទ្ធនឹងរដ្ឋមន្រ្ដីក្រសួងសាម៉ី) ពិចារណារៀបចំគោលការណ៍ជាក់លាក់មួយ ដែលធានាបាននូវកិច្ចសហការរវាងមន្ទីរវិស័យជំនាញជុំវិញខេត្ត និងមន្ទីរព័ត៌មាន ដើម្បីឱ្យការរៀបចំវេទិកាសន្ទនាមតិ ឆ្លើយឆ្លងជាមួយប្រជាពលរដ្ឋនៅតាមមូលដ្ឋានបានផុលផុស ឈានទៅសម្រេចបាននូវការដឹង ការយល់ និងការចូលរួមរបស់ប្រជាពលរដ្ឋ ជាមួយមន្រ្ដីអាជ្ញាធររដ្ឋ រួមគ្នាដើម្បីកសាងសង្គមជាតិដ៏ល្អផូរផង់របស់យើង ឆ្ពោះកាន់វិបុលភាព វឌ្ឍនភាព និងនិរន្ដរភាព៕
