លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ បានថ្លែងអំណរគុណអ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុនវឌ្ឍនៈ ប្រ៊ូវេរី ដែលបានឧបត្ថម្ភជំនួយសប្បុរសធម៌ ក្នុងកម្មវិធីសិល្បៈសប្បុរសធម៌ដើម្បីវីរកងទ័ព នៅល្ងាចថ្ងៃទី២៣ ខែសីហា ឆ្នាំ២០២៥។
លោកជំទាវបណ្ឌិតសភាចារ្យ ភឿង សកុណា បានអរគុណបែបនេះ ក្នុងឱកាសទទួលការចូលរួមឧបត្ថម្ភពីអ្នកឧកញ៉ា សំអាង វឌ្ឍនៈ ជាជំនួយសប្បុរសធម៌ ដល់សាលាមធ្យមវិចិត្រសិល្បៈ នូវភេសជ្ជៈ វី-អាកទីវ ចំនួន៥០០កេស ទឹកពិសាប្រណិត វី-អាកទីវ ចំនួន៥០០កេស និងថវិកាចំនួន ១០លានរៀល ក្នុងកម្មវិធីសិល្បៈសប្បុរសធម៌ដើម្បីវីរកងទ័ព និងបានឧបត្ថម្ភដល់ក្រុមសិល្បៈ ដែលបានសម្តែងក្នុងកម្មវិធីចំនួន ១០លានរៀល ក្រុមថតរូប ១ ២០០ ០០០រៀល ឧបត្ថម្ភអ្នកចូលរួមទស្សនាពិសារទឹកភេសជ្ជៈដោយសេរី និងសម្របសម្រួលសម្រាប់រថយន្ដដឹកសម្ភារ:ដល់ទីកន្លែងចំនួន១គ្រឿងនាពេលខាងមុខ។
សូមបញ្ជាក់ថា សិស្សសាលាមធ្យមវិចិត្រសិល្បៈ បានរួមគ្នាសម្តែងទស្សនីយភាពសិល្បៈ ស្នាដៃសិស្សឆ្នាំសិក្សា ២០២៤-២០២៥ រួមមាន របាំបុរាណ របាំប្រពៃណី សៀក និងល្ខោនខោលជាដើមដើម្បីប្រមូលថវិកាជួយឧបត្ថម្ភកងទ័ពជួរមុខ និងជនភៀសសឹកនៅតំបន់ជម្លោះព្រំដែនកម្ពុជា-ថៃ៕
