សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្ញើសារលិខិតរំលែកទុក្ខជូនលោកជំទាវ គាត កុលណី ព្រមទាំងក្រុមគ្រួសារ ចំពោះមរណភាព ឯកឧត្តម ឆាន់ សាផាន ទីប្រឹក្សារាជរដ្ឋាភិបាល កាលពីថ្ងៃសុក្រ ១១កើត ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៣ ខែតុលា ឆ្នាំ២០២៥ វេលាម៉ោង ១៨:៣៦នាទី ក្នុងជន្មាយុ ៨១ឆ្នាំ ដោយរោគាពាធ។
ក្នុងវេលាដ៏សែនក្ដុកក្ដួលនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សូមសម្តែងនូវក្តីសោកស្តាយ និងស្រណោះអាឡោះអាល័យជាពន់ពេកជាមួយលោកជំទាវ និងក្រុមគ្រួសារទាំងអស់ ចំពោះការបាត់បង់ ស្វាមី ឪពុក ជីតា ជីតាទួត និងញាតិសន្តានជាទីស្រឡាញ់ ប្រកបដោយព្រហ្មវិហារធម៌ គុណធម៌ដ៏ល្អប្រពៃ នៅក្នុងគ្រួសារ។ ការលាចាកលោកនាពេលនេះ របស់ ឯកឧត្តម ឆាន់ សាផាន ជាការបាត់បង់ទីប្រឹក្សារបស់ រាជរដ្ឋាភិបាលមានសមត្ថភាព និងគុណតម្លៃខ្ពស់មួយរូប ដែលធ្លាប់បានលះបង់កម្លាំងកាយ ចិត្ត ប្រាជ្ញា ស្មារតី ចូលរួមតស៊ូរំដោះប្រទេសជាតិ ប្រជាជន និងកសាង អភិវឌ្ឍន៍សង្គមជាតិ។
លើសពីនេះទៀត ឯកឧត្តម បានធ្វើពលិកម្មគ្រប់បែបយ៉ាង និងនៅគ្រប់កាលៈទេសៈរួមដំណើរជីវិតជាមួយ លោកជំទាវ ជាភរិយា លើកស្ទួយវិស័យព្រះពុទ្ធសាសនា និងមនុស្សធម៌ ដើម្បីឧត្តមប្រយោជន៍ជាតិ សាសនា ព្រះមហាក្សត្រ។
ស្ថិតក្នុងវេលាប្រកបដោយសមានទុក្ខដ៏ក្រៀមក្រំនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសហការីនៃកាកបាទក្រហមកម្ពុជា សូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្តម ឆាន់ សាផាន បានទៅកាន់ក្នុងសុគតិភព កុំបីឃ្លៀងឃ្លាតឡើយ៕
