នៅថ្ងៃទី២៧ ខែធ្នូ ឆ្នាំ២០២៥នេះ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានដឹកនាំគណៈប្រតិភូក្រសួងផែនការ ព្រមទាំងសហការី ចុះមកសួរសុខទុក្ខ និងយកអំណោយរបស់មហាគ្រួសារនៃក្រសួងផែនការ ចែកជូនបងប្អូនប្រជាពលរដ្ឋភៀសសឹក ដែលកំពុងស្នាក់អាស្រ័យនៅមណ្ឌលសុវត្ថិភាព និងជម្រកបណ្តោះអាសន្ននៅវត្តស្វាយធំ ស្ថិតនៅភូមិជ្រៃ ឃុំកណ្តែក ស្រុកប្រាសាទបាគង ខេត្តសៀមរាប ចំនួន ១៧២គ្រួសារ( ស្មេីនឹង ៥៤៤នាក់) ដោយមានការចូលរួមពីសំណាកលោកអភិបាលរងខេត្ត សមាជិកក្រុមប្រឹក្សាខេត្ត អភិបាលរងស្រុក អាជ្ញាធរមូលដ្ឋាន។
ថ្លៃងក្នុងពិធីនោះ ឯកឧត្តមរដ្ឋមន្ត្រី បាននាំយកប្រសាសន៍ផ្តាំផ្ញេីសាកសួរសុខទុក្ខពីសំណាកសម្តេចតេជោ ហ៊ុន សែន ប្រធាព្រឹទ្ធសភា និងសម្តេចមហាធិបតីនាយករដ្ឋមន្ត្រី ជូនលោកតា លោកយាយ អ៊ំមីងមា បងប្អូនប្រុសស្រី ក្មួយៗទាំងអស់ និងបានសម្តែងការសោកស្តាយ និងឈឺចាប់ជាពន់ពេក ចំពោះការលំបាក ការរងខូចខាតទ្រព្យសម្បត្តិ និងការបាត់បង់មុខរបរ ប្រកបជីវភាពប្រចាំថ្ងៃរបស់បងប្អូន និងការអាក់ខានទៅសាលារៀនរបស់ក្មួយៗដែលកំពុងតែជួបប្រទះ នាពេលនេះ។
ឯកឧត្តមរដ្ឋមន្ត្រីបន្ថែមថា ដើម្បីដោះស្រាយការលំបាក និងជួយសម្រាលបន្ទុកមួយផ្នែករបស់ក្រុមគ្រួសារភៀសសឹកទាំងអស់ ដែលត្រូវបង្ខំចិត្តជម្លៀសខ្លួនចេញពីផ្ទះសម្បែង ដើម្បីគេចចេញពីការទម្លាក់គ្រាប់បែក និងគ្រាប់ផ្លោងពីសំណាក់កងទ័ពសៀម ដែលបានធ្វើការឈ្លានពានមកលើអធិបតេយ្យ និងបូរណភាពដែនដីរបស់កម្ពុជា ក្នុងនាមជារដ្ឋមន្ត្រីក្រសួងផែនការ និងមហាគ្រួសារក្រសួងផែនការ ជាស្មារតីរួបរួមគ្នា បានរៀបចំជាអំណោយជាគ្រឿងបរិភោគ និងសម្ភារមកចែកជូននាពេលនេះ។
ឯកឧត្តមរដ្ឋមន្ត្រី មានប្រសាសន៍សូមឱ្យបងប្អូនយើងទំាងអស់គ្នាជឿជាក់លើរាជរដ្ឋាភិបាលកម្ពុជាដែលមាន សម្តេចមហាធិបតីនាយករដ្ឋមន្ត្រី ជាប្រមុខដឹកនាំដ៏ឆ្នើមប្រកបដោយថាមពល និងសក្តានុពល បានប្រកាន់គោលការណ៍ស្ងាត់តែមិនស្ងៀម ដៃម្ខាងជាប់រវល់ ក្នុងការដឹកនាំ និងដាក់ចេញយុទ្ធសាស្ត្រប្រកបដោយភាពបត់បែនទន់ភ្លន់ និងឆ្លាតវៃទំាងលើសមរភូមិការទូត និងសមរភូមិយោធា ក្នុងការបញ្ចប់សង្គ្រាមឱ្យបានឆាប់ៗ ដើម្បីបញ្ចៀសការបាត់បងអាយុជីវិត រងរបួស និងការខូចខាតទ្រព្យសម្បត្តិរបស់បងប្អូនប្រជាពលរដ្ឋ និងដៃម្ខាងទៀតមានបេសកកម្មក្នុងការដឹកនាំគ្រប់គ្រងស្ថានភាព ពិសេសយកចិត្តទុកដាក់ខ្ពស់លើសុខទុក្ខ សុវត្ថិភាព និងជីវភាពរស់នៅរបស់បងប្អូនជនភៀសសឹក៕
