ទេសរដ្ឋមន្ដ្រី អូស្មាន ហាស្សាន់ ដឹកនាំគណៈប្រតិភូបំពេញទស្សនកិច្ចការងារ នៅម៉ាឡេស៊ី ដើម្បីពង្រឹងកិច្ចសហប្រតិបត្តិការលើវិស័យអប់រំ

(ភ្នំពេញ)៖ ដោយមានការអនុញ្ញាតដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅល្ងាចថ្ងៃទី១៣ ខែមករា ឆ្នាំ២០២៦ ឯកឧត្តមបណ្ឌិត អូស្មាន ហាស្សាន់ បានអញ្ជើញដឹកនាំគណៈប្រតិភូ ចេញដំណើរទៅទស្សនកិច្ចការងារ នឹងសហភាពវិជ្ជាជីវៈគ្រូបង្រៀនជាតិម៉ាឡេស៊ី (NUTP) ដែលមានសមាជិក ជាលោកគ្រូ អ្នកគ្រូជាង៤៣ម៉ឺននាក់ នៅប្រទេសម៉ាឡេស៊ី ចាប់ពីថ្ងៃទី១៣ ដល់ថ្ងៃទី១៧ ខែមករា ឆ្នាំ២០២៦។

ដំណើរទស្សនកិច្ចនេះ ធ្វើឡើងបន្ទាប់ពីឯកឧត្តមទេសរដ្ឋមន្ត្រី អូស្មាន ហាស្សាន់ បានជួបពិភាក្សាការងារមួយចំនួន ជាមួយលោក Aminuddin Bin Awang ប្រធាន NUTP កន្លងទៅ ដើម្បីពង្រឹងកិច្ចសហប្រតិបត្តិការ លើវិស័យអប់រំជាតិ និងវិស័យសាសនាឥស្លាម និងបានផ្សាភ្ជាប់ទំនាក់ទំនងរវាងសមាគមគ្រូបង្រៀនខ្មែរឥស្លាម (CAMTA) ការផ្លាស់ប្តូរបទពិសោធន៍ កិច្ចសហការជាយុទ្ធសាស្ត្រ ការអភិវឌ្ឍសមត្ថភាពគ្រូបង្រៀនខ្មែរឥស្លាម ការអភិវឌ្ឍទំនើបកម្មជំនាញវិជ្ជាជីវៈជាដើម។ NUTP មានសមាជិកទាំងគ្រូបង្រៀនជាតិ និងសាសនាជាង៤៣ម៉ឺននាក់ នៅទូទាំងប្រទេសម៉ាឡេស៊ី។

សូមជម្រាបថា ក្នុងដំណើរទស្សនកិច្ចនេះ ឯកឧត្តមទេសរដ្ឋមន្ត្រី អូស្មាន ហាស្សាន់ នឹងជួបពិភាក្សាការងារជាមួយរដ្ឋមន្ត្រីម៉ាឡេស៊ីចំនួន៥ ក្នុងនោះមានរដ្ឋមន្ត្រីក្រសួងអប់រំម៉ាឡេស៊ី រដ្ឋមន្ត្រីក្រសួងយុវជន និងកីឡា រដ្ឋមន្ត្រីទីស្ដីការគណៈរដ្ឋមន្ត្រីទទួលបន្ទុកកិច្ចការសាសនាម៉ាឡេស៊ី រដ្ឋមន្ត្រីក្រសួងសារគមនាគមន៍ម៉ាឡេស៊ី ក្រសួងផ្សេងៗទៀត និងថ្នាក់ដឹកនាំផ្សេងទៀតផងដែរ៕