សាខាកាកបាទក្រហមកម្ពុជាខេត្តមណ្ឌលគិរី រៀបចំពិធីអបអរសាទរខួបលើកទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៦ ក្រោមមូលបទ៖ «បន្តរួមកម្លាំង ដើម្បីមនុស្សធម៌»។
ពិធីនេះធ្វើឡើងក្រោមអធិបតីភាព អ្នកឧកញ្ញា អ៉ឹង ស៉ីតាតវីរៈ ប្រធានកិត្តិយសសាខាកាកបាទក្រហមកម្ពុជា ខេត្តមណ្ឌលគិរី ឯកឧត្តម ថង សាវុន ប្រធានគណៈកម្មាធិការសាខាកាកបាទក្រហមកម្ពុជាខេត្ត ឯកឧត្តម ម៉ែន ង៉ុយ អនុប្រធានកិត្តិយសសាខាខេត្ត លោកជំទាវ ហេង លីដែន អនុប្រធានកិត្តិយសសាខាខេត្ត ឯកឧត្តម សាយ ម៉េងគីម អនុប្រធានអចិន្រ្តៃយ៍គណៈកម្មាធិការសាខាខេត្ត រួមទាំងសមាជិក សមាជិកា និងសប្បុរសជនជាច្រើនរូប ដែលប្រព្រឹត្តទៅសាលប្រជុំសាលាខេត្តមណ្ឌលគិរី ថ្ងៃអាទិត្យ ទី១០ ខែឧសភា ឆ្នាំ២០២៦។
ឯកឧត្តម ថង សាវុន បានថ្លែងថា ដើម្បីអនុវត្តសកម្មភាពមនុស្សធម៌ ក្នុងក្របខ័ណ្ឌផែនការយុទ្ធសាស្ត្ររបស់កាកបាទក្រហមកម្ពុជា រហូតសម្រេចបាននូវសមិទ្ធផលជាច្រើន ក្នុងការបំពេញបេសកកម្មជាប្រវត្តិសាស្ត្ររបស់ខ្លួនជូនជាតិ និងប្រជាជនយើង។
ឯកឧត្តមបានថ្លែងអំណរគុណ កោតសរសើរដោយស្មោះ ជូនចំពោះថ្នាក់ដឹកនាំ មន្ត្រី បុគ្គលិក អ្នកស្មគ្រ័ចិត្ត និងយុវជនសាខាកាកបាទក្រហមខេត្ត ព្រមទាំងមន្ទីរ អង្គភាពពាក់ព័ន្ធទាំងអស់ ជានិច្ចកាល តែងបានប្រឹងប្រែងអស់ពីកម្លាំងកាយចិត្ត ក្នុងការបំពេញតួនាទីរបស់ខ្លួនឱ្យទទួលបាននូវជោគជ័យ និងសមិទ្ធផលដ៏ធំធេង ឆ្លើយតបបានយ៉ាងស័ក្តិសម និងទាន់ពេលវេលាទៅនឹងការងារជួយសង្គ្រោះជនរងគ្រោះប្រកបដោយប្រសិទ្ធភាព និងការទទួលខុសត្រូវខ្ពស់។
ឯកឧត្តមបានថ្លែងអំណរគុណយ៉ាងជ្រាលជ្រៅចំពោះ ឯកឧត្តម លោកជំទាវ អ្នកឧកញ៉ា លោក លោកស្រី សប្បុរសជន អង្គការមិនមែនរដ្ឋាភិបាលជាតិ និងដៃគូសហប្រតិបត្តិការទាំងអស់ ដែលបានចូលរួមជួយគាំទ្រជាថវិកា សម្ភារៈ ស្មារតី និងបច្ចេកទេសសម្រាប់ប្រតិបត្តិការមនុស្សធម៌របស់សាខាកាកបាទក្រហមខេត្តមណ្ឌលគិរី នៅគ្រប់កាលៈទេសៈ។
ឯកឧត្តម សាយ ម៉េងគីម បានបញ្ជាក់ថា ក្នុងឆ្នាំ២០២៥-២០២៦នេះ សាខាកាកបាទក្រហមកម្ពុជា ខេត្ត បានផ្តល់អំណោយមនុស្សធម៌ ជូនដល់ប្រជាពលរដ្ឋរងគ្រោះ និងងាយរងគ្រោះ ដោយប្រការផ្សេងៗជាង ៤០០គ្រួសារ, ផ្សព្វផ្សាយពីសុខភាពមាតា ទារក និងកុមារដល់ពលរដ្ឋតាមខ្នងផ្ទះ និងមណ្ឌលសុខភាព, បណ្តុះបណ្តាលវិជ្ជាសង្រ្គោះបឋម ជូនដល់យុវជន អ្នកស្ម័គ្រចិត្តមន្រ្តីបរិស្ថាន បុគ្គលិកអង្គការ សហគមន៍ និងអ្នកស្ម័គ្រចិត្តតាមភូមិ, ផ្សព្វផ្សាយការគ្រប់គ្រងគ្រោះមហន្តរាយជូនដល់ប្រជាពលរដ្ឋ, ការកាត់បន្ថយថង់ផ្លាស់ស្ទិក សុវត្ថិភាពចរាចរណ៍ ជួសជុលទឹកស្អាតជូនប្រជាពលរដ្ឋ ផ្សព្វផ្សាយពីវិធានការការពារជំងឺគ្រុនឈាម គ្រុនចាញ់ និងជំងឺផ្សេងៗ ដល់ប្រជាពលរដ្ឋ ជាពិសេស បញ្ច្រាបការលើកកម្ពស់ការយល់ដឹងពីវប្បធម៌អហិង្សា និងសន្តិភាព នឹងការកាត់បន្ថយការរំលោភបំពានផ្លូវភេទកុមារ តាមប្រព័ន្ធអនឡាញដល់យុវជនតាមសាលា និងផ្សព្វផ្សាយគោលការណ៍គ្រឹះកាកបាទក្រហម អឌ្ឍចន្ទក្រហម ដល់កងកម្លាំង យុវជន នៅតាមសាលារៀន។
ឯកឧត្តមបានបន្ថែមថា សកម្មភាពមនុស្សធម៌នេះ គឺជាការចូលរួមជួយជ្រោមជ្រែង និងការជួយឧបត្ថម្ភគាំទ្រពីសប្បុរសជនទាំងអស់ ដើម្បីឱ្យសាខាកាកបាទក្រហមកម្ពុជា ខេត្តមណ្ឌលគិរី មានលទ្ធភាពអាចបំពេញបេសកម្មជួយដល់ជនរងគ្រោះ និងងាយរងគ្រោះ នៅតាមមូលដ្ឋានបានទាន់ពេលវេលា៕
