រសៀលថ្ងៃទី ១៣ ខែធ្នូ ឆ្នាំ ២០១៨ ឯកឧត្តមរដ្ឋលេខាធិការប្រចាំការ ស៊ិន វុទ្ធី តំណាងដ៏ខ្ពង់ខ្ពស់ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានអញ្ជើញចូលរួមជាកិត្តិយស ក្នុងពិធីចុះហត្ថលេខាលើកិច្ចព្រមព្រៀងឥណទានសម្បទាន រវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋប្រជាមានិតចិន ។
ពិធីចុះហត្ថលេខាខាងលើនេះ ប្រព្រឹត្តទៅនៅទីស្តីការក្រសួងសេដ្ឋកិច្ច និងហិរញ្ញវត្ថុ ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឯកឧត្តម Deng Boqing អនុប្រធានទីភ្នាក់ងារចិនសម្រាប់កិច្ចសហប្រតិបត្តិការ នៃសាធារណរដ្ឋប្រជាមានិតចិន ។
សូមជម្រាបជូនថា ឥណទានសម្បទានខាងលើនេះ មានទឹកប្រាក់ចំនួន ៦២២ លានយ័នចិន (ស្មេីរនឹងប្រមាណ ៩៨ លានដុល្លារអាមេរិក) ដេីម្បីកសាងអាងទឹករក្សាដែលស្ថិតក្នុងឃុំរក្សា និងឃុំតស៊ូ ស្រុករវៀង ខេត្តព្រះវិហារ ។ ទំនប់អាងទឹកនេះមានសមត្ថភាពស្តុកទឹក បានប្រមាណ ២៥៧ លានម៉ែត្រគូប បម្រើឲ្យការងារស្រោចស្រពស្រូវរដូវស្សា ចំនួន ១៤៣.៣២៣ ហិកតា និងស្រូវរដូវប្រាំងចំនួន ២២.៧៨៧ ហិកតា ក្នុងទឹកដីខេត្តព្រះវិហារ និងជាពិសេសខេត្តកំពង់ធំ ។