សម្តេចតេជោ ហ៊ុន សែន៖ មិនយូរប៉ុន្មានទេ កម្ពុជានឹងសម្បូរអគ្គិសនីប្រើប្រាស់ជាមួយតម្លៃថោកសមរម្យ


ភ្នំពេញ: សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណា ចក្រកម្ពុជា បានអនុញ្ញាតអោយ លោក លី ឈីងគុយ  (Li Qingkui ) ប្រធានក្រុមហ៊ុន China Southern Power Grid ដែលជាក្រុមហ៊ុនផ្គត់ផ្គង់ និងតភ្ជាប់បង្គោលខ្សែបណ្តាញអគ្គិសនីចូលជួបសម្ដែងការគួរសម និងស្នើសុំការជួយគាំទ្រ ពីសម្ដេចតេជោនៅល្ងាចថ្ងៃទី១៤ខែតុលាឆ្នាំ២០១៦។ប្រមុខរាជរដ្ឋាភិបាលបានអះអាងថាមិនយូរប៉ុន្មានទេ កម្ពុជានឹងសម្បូរអគ្គិសនីប្រើប្រាស់ជាមួយតម្លៃថោកសមរម្យ។
ទន្ទឹមនឹងគម្រោងវិនិយោគផ្នែកអគ្គីសនីនៅកម្ពុជា លោក Li Qingkui បានប្ដេជ្ញាចិត្តចូលរួមជួយបណ្ដុះបណ្ដាលធនធានមនុស្សកម្ពុជា លើជំនាញអគ្គិសនីនៅក្នុងកម្រិត បរិញ្ញាបត្រ និងបរិញ្ញាបត្រជាន់ខ្ពស់ ។ នៅជំហានដំបូងនេះគឺក្រុមហ៊ុននឹងបណ្ដុះបណ្ដាលពលរដ្ឋកម្ពុជាចំនួន២៥នាក់។ ក្រុមហ៊ុន China Southern Power Grid ក៏នឹងចូលរួមផងដែរនៅក្នុងការធ្វើផែនការមេ ដោយសហការជាមួយក្រសួងពាក់ព័ន្ឋ និងរាជរដ្ឋាភិបាលកម្ពុជាក្នុងការរៀបចំតខ្សែបណ្ដាញអគ្គិសនី នៅទូទាំងប្រទេស ដើម្បីមានភាពងាយស្រួលក្នុងការតភ្ជាប់ និងចែកចាយទៅប្រទេសជិតខាង។
លោកប្រធានក្រុមហ៊ុនបានពិភាក្សាបញ្ហានេះមួយជំហានហើយជាមួយ អ្នកឧកញ៉ា គិត ម៉េង, លោក ស៊ុយ សែម និងបានចុះកិច្ចព្រមព្រៀងលើឯកសារមួយចំនួន នៅក្រោមអធិបតីភាពដ៏ខ្ពង់ខ្ពស់របស់ សម្ដេចតេជោនាយករដ្ឋមន្ត្រី ហ៊ុន សែន និង លោកប្រធានាធិបតីចិន ស៊ី ជិនពីង។ ក្រុមហ៊ុនលោកនឹងចាប់ដៃគូជាមួយក្រុមហ៊ុន Royal Group លើវិស័យថាមពលនេះ។
ពេលនេះអ្នកវិនិយោគចិនបានចាប់អារម្មណ៍ចំពោះកម្ពុជាយ៉ាងខ្លាំង និងមានជំនឿលើការដឹកនាំដ៏ត្រឹមត្រូវបំផុតរបស់ សម្ដេចតេជោនាយករដ្ឋមន្ត្រី ដែលបានធ្វើអោយកំណើនសេដ្ឋកិច្ចជាតិមានសន្ទុះកើនថេរ៧%។ ម្យ៉ាងទៀតប្រទេស កម្ពុជា នៅមានតម្រូវការភ្លើងប្រើទៅគ្រប់ទីកន្លែង។ ដូច្នេះការរៀបចំតបណ្តាញខ្សែភ្លើងទូទាំងប្រទេសត្រូវរៀបចំអោយបានល្អប្រកបដោយគុណភាព។
សម្តេចនាយករដ្ឋមន្ត្រី រីករាយស្វាគមន៍ចំពោះក្រុមហ៊ុន ដែលបានយកចិត្តទុកដាក់ជួយបណ្ដុះបណ្ដាលធនធានមនុស្សក្នុងវិស័យអគ្គិសនី។ សម្តេចតេជោ បានផ្តល់សេចក្តីទុកចិត្តយ៉ាងខ្លាំងចំពោះក្រុមហ៊ុន China Southern Power Grid ដែលជាក្រុមហ៊ុនដ៏ធំលំដាប់លេខ២លើពិភពលោករបស់ចិន។ មិនយូរប៉ុន្មានទេ កម្ពុជានឹងសម្បូរអគ្គិសនីប្រើប្រាស់ជាមួយតម្លៃថោកសមរម្យ ដែលនឹងជួយដល់ការកាត់បន្ថយភាពក្រីក្រដល់ប្រជាពលរដ្ឋយើងជាមិនខាន។  ច្បាស់ណាស់គឺ តម្រូវការភ្លើងជារឿងចាំបាច់បំផុតក្នុងការអភិវឌ្ឍន៍ប្រទេសអោយរីកចម្រើន៕