រាជធានីភ្នំពេញ៖ “គ្មានចំណេះដឹងប្រវត្តិសាស្ត្រ អាចធ្វើឱ្យកំហុសក្នុងប្រវត្តិសាស្ត្រកើតឡើងជាថ្មី” នេះជាប្រសាសន៍ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្នុងឱកាសនៃកម្មវិធីបាឋកថាស្តីពី ខួបអនុស្សាវរីយ៍លើកទី៤០ នៃទិវាជ័យជម្នះ ៧ មករា និងខួបលើកទី២០ នៃការបញ្ចប់សង្គ្រាមស៊ីវិលនៅកម្ពុជា។
ឆ្លៀតឱកាសនោះ ឯកឧត្តមបណ្ឌិតក៏បានផ្ដល់អនុសាសន៍ថា “គ្មានការអភិវឌ្ឍណា អាចកើតឡើងបានដោយគ្មានធនធានមនុស្សប្រកបដោយគុណភាពឡើយ ហើយក៏គ្មានភាពរីកចម្រើនណាមួយ ដែលបានមក ដោយគ្មានសាមគ្គីភាព និងការប្រឹងប្រែងទាំងអស់គ្នានោះទេ”។
បាឋកថានេះត្រូវបានរៀបចំឡើង នាព្រឹកថ្ងៃពុធ ១២រោច ខែមិគសិរ ឆ្នាំច សំរឹទ្ធិស័ក ព.ស. ២៥៦២ នៅវិទ្យាស្ថានជាតិអប់រំ ក្នុងគោលដៅបង្កើនការយល់ដឹងពីប្រវត្តិសាស្ត្រកម្ពុជា បញ្ចៀសកំហុស ឆ្ពោះទៅរកការអភិវឌ្ឍប្រទេសជាតិឱ្យកាន់តែរីកចម្រើនជឿនលឿន។ កម្មវិធីនេះក៏មានការចូលរួមពីសំណាក់ថ្នាក់ដឹកនាំក្រសួង អង្គភាពជំនាញ តំណាងសាកលវិទ្យាល័យ សាស្ត្រាចារ្យ គរុនិស្សិត និងគ្រូឧទ្ទេសមកពីសាលាគរុកោសល្យនានា៕
