(ភ្នំពេញ)៖ ឯកឧត្តមជុំ កុសល ទីប្រឹក្សាសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជារដ្ឋលេខាធិការក្រសួងព័ត៌មាន នៅថ្ងៃទី០៦ ខែមករា ឆ្នាំ២០១៩នេះ បានលើកឡើងថា ថ្ងៃ៧មករា មានតម្លៃទាំង អតីតកាល បច្ចុប្បន្នកាល និងអនាគតកាល។
ឯកឧត្តម ជុំ កុសល បានពន្យល់ថា អតីតកាល៖ ៧មករាបានសង្គ្រោះជីវិតប្រជាជនកម្ពុជាពីរបបប្រល័យពូជសាសន៍ប៉ុលពត ឱ្យបន្តរស់ កសាងគ្រួសារ និងជីវភាពរស់នៅជាថ្មីឡើងវិញ។ បច្ចុប្បន្នកាល៖ មានអ្វីៗគ្រប់បែបយ៉ាងគឺបានកើតចេញពី៧មករា។ គ្មាន៧មករាអតីតកាលក៏គ្មានបច្ចុប្បន្នកាលដែរ។ អនាគតកាល៖ ៧មករានៅតែជាថ្ងៃដ៏មានអត្ថន័យ រំលឹកជីវិតរស់ឡើងវិញជានិរន្តរ។
ឯកឧត្តមបានបន្តថា៖ ក្រោយឆ្នាំ១៩៧៩ អ្នកប្រឆាំង ៧មករានិងចាត់ទុក៧មករាជាសត្រូវរបស់គេគឺជាអ្នកដែលត្រូវបានទទួលបរាជ័យដោយសារ៧មករានេះឯង ។ ប៉ុន្តែ ក្រោយពេលធ្វើសមាហរ័ណកម្មឆ្នាំ១៩៩៨ ៧មករាក៏អស់សត្រូវរបស់ខ្លួនដែរ ។
ឯកឧត្តមបានបញ្ជាក់បន្ថែមថា៖ «នៅពេលកម្ពុជាបានចូលក្នុងបរិបទប្រជាធិបតេយ្យសេរីពហុបក្សបែរជាអ្នកប្រឆាំងនៅកម្ពុជាគេបានយក ៧មករាមកធ្វើជាសត្រូវរបស់គេបន្តពីអតីតក្រុមខ្មែរក្រហមទៅវិញ ! ។ តើអ្នកប្រឆាំង៧មករា បានប្រយោជន៍អ្វីមកអ្នកវិញ បើក្នុងនាមអ្នកជាអ្នកនយោបាយត្រូវការសំឡេងគាំទ្រពីប្រជាពលរដ្ឋ?»។
ឯកឧត្តមបានបញ្ជាក់ទៀតថា៖ «៧មករាប្រៀបបានជាឱសថទិព្វ បានជួយសង្គ្រោះជិវិតប្រជាជនកម្ពុជាឱ្យបានរស់ឡើងវិញសារជាថ្មី ។ ដូច្នេះ៧មករា ពិតជាមានឥទ្ធិពលក្នុងដួងចិត្តរបស់ជនរងគ្រោះគ្រប់រូប ដែលបានឆ្លងកាត់របបប៉ុលពត។ ប្រសិនបើអ្នកឆ្លាត អ្នកមិនគួរប្រឆាំង « សច្ចធម៌ប្រវត្តិសាស្ត្រ» ឡើយ!»៕
