ឯកឧត្តម សុខ ឥសាន បានលើកឡើងថា បើតាមច្បាប់​អ្នកដែលគាំទ្រ ទណ្ឌិតសម​ រង្ស៊ី គឺជាអ្នកប្រឆាំង នឹងសាលដីការស្ថាពរ និងបិទផ្លូវតវ៉ា របស់តុលាការកំពូល


ភ្នំពេញ៖ ក្រោយពីអតីត គណបក្សសង្គ្រោះជាតិ (CNRP) ត្រូវបានរំលាយចោល កាលពីចុងឆ្នាំ២០១៧ប៉ុន្តែ នៅតែមាន អតីតមន្រ្តី របស់បក្សនេះនិងសកម្មជន មួយចំនួនប្រកាសគាំទ្រលោក សម រង្ស៊ី ជាប្រធានស្ដីទីទៀតនោះ ត្រូវបានអ្នកនាំពាក្យ គណបក្សប្រជាជនកម្ពុជា (ប្រ.ជ) ឯកឧត្តម សុខ ឥសាន បានលើកឡើងថា បើតាមច្បាប់​អ្នកដែលគាំទ្រ ទណ្ឌិតសម​ រង្ស៊ី គឺជាអ្នកប្រឆាំង នឹងសាលដីការស្ថាពរ និងបិទផ្លូវតវ៉ា របស់តុលាការកំពូល ​ដែលបានរំលាយអតីតគណបក្សសង្គ្រោះជាតិ ។

អ្នកនាំពាក្យគណបក្សកាន់អំណាច ឯកឧត្តម សុខ ឥសាន បានថ្លែងតាមរយៈបណ្តាញទំនាក់ទំនង តេឡេក្រាមនៅថ្ងៃទី៧ ខែមករា ឆ្នាំ២០១៩នេះថា ” អស់លោកអ្នកគាំទ្រទណ្ឌិតសម​ រង្ស៊ី​ បើតាមច្បាប់​អ្នកដែលគាំទ្រ ទណ្ឌិតសម​ រង្ស៊ី គឺជាអ្នកប្រឆាំង នឹងសាលដីការស្ថាពរ និងបិទផ្លូវតវ៉ា របស់តុលាការកំពូល ​ដែលបានរំលាយអតីត គណបក្សសង្គ្រោះជាតិ រួចទៅហើយ​ តើនៅមានប្រធានស្អីទៀតត្រូវគាំទ្រនោះ​ “។

ឯកឧត្តមបានបន្តទៀតថា​ ទោះបីមានប្រជាជនកម្ពុជាទូទាំងប្រទេសស្អប់ មិនចង់ឃើញមុខ ទណ្ឌិតសម​ រង្ស៊ី​ ជនក្បត់ជាតិ យ៉ាងណាក្តី​ ក៏ដោយសារប្រទេសកម្ពុជាបើកទូលាយ សិទ្ធិសេរីភាព ខាងនយោបាយ ទើបនៅមានប្រជាជនមួយចំនួនតូច នៅតែលង់ជឿ តាមការនិយាយប្រូ របស់ទណ្ឌិតសម​ រង្ស៊ី​ ដែរ។ ដោយមានសេរីភាពយ៉ាងនេះ ​ទើបពួកគេមានលទ្ធភាពជួបជុំគ្នា នៅតាមផ្ទះសម្តែងមតិ គាំទ្រទណ្ឌិតសម​ រង្សីរហូតអ្នកខ្លះចង់ឲ្យ ទណ្ឌិតរូបនេះ មកចូលកម្ពុជាវិញទៀតផង​ ។

ឯកឧត្តមបានលើកឡើងបន្ថែមទៀតថា ការដែលសមត្ថកិច្ច កោះហៅមកអប់រំ និងធ្វើកិច្ចសន្យានោះ គឺជាវិធីសន្តិវិធី សម្រាប់ប្រជាជនសាមញ្ញ ដែលមិនដឹងច្បាប់​ ។ កិច្ចសន្យាមិនមែនច្បាប់ទេ​ តែជាការឲ្យសន្យាឈប់ប្រពឹត្ត​ តែបើនៅតែចចេសរឹងរូស​នោះ វិធានការណ៏ច្បាប់ នឹងត្រូវយកមកអនុវត្ត​ ។ តិចថាសមត្ថកិច្ច មិនយោគយល់? ម៉្យាងទៀត​ វិទ្យុ របបចក្រពត្តិ ចេះតែផ្សាយញុះញង់ ៕