បន្ទាប់ពីថ្នាក់ដឹកនាំកំពូលរបស់ប្រទេសជប៉ុនបានបង្ហាញពីឆន្ទៈក្នុងការចាប់យកប្រទេសកម្ពុជា ធ្វើជាគោលដៅវិនិយោគទី១សម្រាប់គម្រោងដ៏មហិមារបស់ខ្លួននៅក្នុងតំបន់អាស៊ីអាគ្នេយ៍កាលពីពេលកន្លងទៅថ្មីនេះ នៅត្រឹមថ្ងៃទី២៧ ខែកុម្ភៈ ឆ្នាំ២០១៩ ខាងមុខ ប្រតិភូដែលជាតំណាងរបស់ប្រទេសជប៉ុននឹងដឹកនាំក្រុមហ៊ុនប្រមាណ៦០ ដែលពាក់ព័ន្ធនឹងវិស័យអចលនទ្រព្យមកសិក្សាស្វែងយល់ពីឱកាសវិនិយោគនៅកម្ពុជា។
តាមរយៈក្រសួងរៀបចំដែនដីនគរូបនីយកម្ម និងសំណង់ នៅត្រឹមថ្ងៃទី២៧ ខែកុម្ភៈ ឆ្នាំ២០១៩ ខាងមុខនេះ ក្រុមហ៊ុនដែលពាក់ព័ន្ធទៅនឹងវិស័យអចលនទ្រព្យ និងសំណង់ ជាង៥០ក្រុមហ៊ុន របស់ប្រទេសជប៉ុននឹងមកបង្ហាញវត្តមាននៅក្នុងកម្មវិធីជំនួបពិភាក្សា និងស្វែងយល់លម្អិតពីឱកាសនៃការវិនិយោគនៅកម្ពុជា ដែលក្នុងនោះក៏មានការចូលរួមពីសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ព្រមគ្នាជាមួយនឹងសមាគមអ្នកអភិវឌ្ឍលំនៅដ្ឋានកម្ពុជាផងដែរ ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបង្ហើបប្រាប់ឱ្យដឹងថា ប្រទេសជប៉ុនបានបង្ហាញពីមហិច្ឆិតា និងឆន្ទៈរបស់ខ្លួនចូលមកវិនិយោគនៅកម្ពុជា ជាមួយនឹងគម្រោងនានាជាច្រើន ជាពិសេស គម្រោងលើការអភិវឌ្ឍក្នុងតំបន់ ដែលសង្កត់ធ្ងន់ទៅលើការរៀបចំហេដ្ឋារចនាសម្ព័ន្ធ និងការអភិវឌ្ឍទីក្រុងដ៏ទំនើបប្រកបដោយប្រណីតភាព ឬ ទីក្រុងឆ្លាត (Smart City)។
លោកបានបន្តទៀតថា ៖ « វាជាសញ្ញាដ៏ល្អប្រសើរមួយសម្រាប់ប្រទេសកម្ពុជា ភាពរីកចម្រើនលើវិស័យអចលនទ្រព្យ គឺជាចំណែកមួយយ៉ាងសំខាន់ក្នុងការអភិវឌ្ឍប្រទេសជាតិ។ ដូច្នេះ នៅពេលមានក្រុមហ៊ុនអន្តរជាតិធំៗកាន់តែច្រើនចូលមកធ្វើការវិនិយោគនៅកម្ពុជា វាគឺជារឿងដ៏ល្អបំផុតរបស់យើង»។
ជាមួយគ្នានេះ លោក ហ៊ុយ វណ្ណា អគ្គលេខាធិកាសមាគមអ្នកអភិវឌ្ឍលំនៅដ្ឋានកម្ពុជា ក៏បានបញ្ជាក់ប្រាប់ពីភាពល្អប្រសើរ នៃវិស័យសំណង់នៅកម្ពុជាផងដែរថា អាស្រ័យដោយចរន្តនៃឧស្សាហកម្មសំណង់នៅកម្ពុជា មានភាពល្អប្រសើរ និងឆាប់រហ័សជាបណ្តាប្រទេសជិតខាងមួយចំនួន ទើបធ្វើឱ្យក្រុមហ៊ុនវិនិយោគវិស័យសំណង់អន្តរជាតិធំៗ ដែលក្នុងនោះរាប់ទាំងក្រុមហ៊ុនមកពីប្រទេសជប៉ុនទាំងជាង ៥០ ដែលនឹងមកធ្វើការសិក្សាស្វែងយល់ពីឱកាសនៃការវិនិយោគផងដែរ ដែលបានងាកមកចាប់អារម្មណ៍ និងចង់បណ្តាក់ទុននៅកម្ពុជាផងដែរ ដែលទាំងអស់នេះ វាគឺជាសញ្ញាវិជ្ជមានមួយដ៏ល្អបំផុតសម្រាប់កម្ពុជា៕