ស្វាយរៀង៖ ស្របពេលកំនើននៃការវិនិយោគ ពីសំណាក់អ្នកវិនិយោគអន្តរជាតិ ពិសេសជនជាតិចិន បានធ្វើឲ្យទីក្រុងបាវិតផ្លាស់ប្តូរមុខមាត់យ៉ាងឆាប់រហ័ស ពិសេសវិស័យហេដ្ឋារចនាសម្ព័ន្ឋបាននិងកំពុងសាងសង់យ៉ាងសកម្ម។
ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋីបានមានប្រសាសន៍ឲ្យដឹងក្នុងពេលចុះពិនិត្យពីដំណើរវិវត្តន៍ នៃវិស័យសំណង់ និងអចលនទ្រព្យនៅក្រុងបាវិតនាថ្ងៃអាទិត្យទី១០ មិនាកន្លងមកថា វិស័យសំណង់ ពិសេសហេដ្ឋារចនាសម្ព័ន្ឋក្នុងខេត្តពិតជាបាននិងកំពុងសាងសង់យ៉ាងសកម្ម ដែលធ្វើឲ្យទីក្រុងនេះនឹងក្លាយជាទីក្រុងដ៏ ស៊ីវិល័យមួយនាពេលអនាគតឆាប់ៗខាងមុខនេះ។
លោកបន្តថា ជាក់ស្តែងកំណាត់ផ្លូវជាតិលេខ១ ក្នុងក្រុងបាវិតបាននិងកំពុងពង្រីកផ្លូវជាពីរគន្លងទៅ ពីរគន្លងមក ដោយមានការកសាងសួនច្បារនៅចំកណ្តាល និងផ្លូវជាច្រើនទៀតក្នុងខេត្តបានពង្រីកទំហំរហូតដល់៣០ទៅ៦០ម៉ែត្រ ដែលជាសក្តានុពលមួយសំរាប់ទាក់ទាញការវិនិយោគ និងជំរុញការរីកចម្រើនក្នុងទីក្រុងនេះកាន់តែឆាប់រហ័ស។
លោកបន្តថា ជាមួយនឹងកំនើននៃការពន្លឿនការកសាង ហេដ្ឋារចនាសម្ព័ន្ឋសាធារណៈនេះ ខេត្តបាននិងកំពុងក្រុងបាវិតបាន និងកំពុងទាក់ទាញការវិនិយោគហេដ្ឋារចនាសម្ព័ន្ឋធំៗជាច្រើនទៀត ដូចជាគំរោងសាងសង់ផ្លូវល្បឿនលឿនភ្នំពេញ បាវិតនាពេលខាងមុខ ឆាប់ៗនេះ។
លោក ឃាង ពុទ្ឋី បានបន្តថា ការកសាងក្រុងបាវិត ពិតជាលឿន ហើយការកសាងហេដ្ឋារចនាសម្ព័ន្ឋរបស់រដ្ឋាភិបាល គឺដើម្បីជំរុញធ្វើយ៉ាងណាឲ្យការដឹកជញ្ជូនកាន់តែមានតម្លៃទាប ហើយពេលតម្លៃដឹកជញ្ជូនទាប ក៏ធ្វើឲ្យតម្លៃបន្ថែមកើនឡើង និងជួយជំរុញកំនើនសេដ្ឋកិច្ចជាតិបន្ថែមទៀត។
លោក Eric Luu អគ្គនាយកក្រុមហ៊ុន Empire World ដែលបាននិងកំពុងត្រៀមសាងសង់ទីក្រុងរណបដ៏ធំមួយនៅទីក្រុងបាវិត បានមានប្រសាសន៍ឲ្យដឹងកាលពីពេលថ្មីៗនេះផងដែរថា ការរីកចម្រើនក្រុងបាវិតនឹងលឿនលើសការរំពឹងទុក ខណៈទីក្រុងនេះស្ថិតនៅស្របជាមួយផ្លូវជាតិលេខ១ ដែលជាច្រករបៀងផ្នែកខាងត្បូងអាស៊ាន និងស្ថិតនៅក្នុងប្រព័ន្ឋនៃផ្លូវខ្សែក្រវ៉ាត់១ ផ្លូវ១របស់ចិន ដែលនឹងសាងសង់មកដល់នាពេលខាងមុខនេះ។
លោកបន្តថា “ក្រុងបាវិតជាទីក្រុងពិសេស១ ដែលរដ្ឋាភិបាលបាននិងកំពុងដាក់ចូលក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ និងជាទីក្រុងមួយដែលជាមជ្ឈមណ្ឌលពាណិជ្ជកម្ម ឧស្សាហកម្ម និងសេដ្ឋកិច្ច ដែលជាចំណុចកណ្តាលតភ្ជាប់រវាងទីក្រុងហូ ជីម៉ិញ និងទីក្រុងភ្នំពេញនាពេលអនាគត”៕