ភ្នំពេញ៖ កម្មវិធីបង្រៀនសាកល្បងកម្មវិធីសិក្សាជំនាញកែច្នៃអាហារ ត្រូវបានរៀបចំឡើងក្នុងគោលដៅសាកល្បងអនុវត្ត វិធីសាស្ត្របង្រៀនកម្មវិធីសិក្សាជំនាញកែច្នៃអាហារ លើមុខវិជ្ជាគណិតវិទ្យា គីមីវិទ្យា ជីវវិទ្យា ភាសាអង់គ្លេស និងមុខវិជ្ជាបច្ចេកទេសសម្រាប់ឆ្នាំទី១ ២ និងទី៣ និងដើម្បីបង្រៀនសាកល្បងលើមុខជំនាញកែច្នៃអាហារ និងមុខវិជ្ជាចំណេះទូទៅ។ ម្យ៉ាងវិញទៀត កម្មវិធីនេះក៏ជាឱកាសដើម្បីប្រមូលធាតុចូលជាក់ស្ដែងពីគ្រូបង្រៀន មាតា បិតា សិស្ស តំណាងសិស្ស និងគណៈគ្រប់គ្រងសាលា ដើម្បីកែលម្អសេចក្ដីព្រាងកម្មវិធីសិក្សា។
កម្មវិធីនេះបានប្រព្រឹត្តទៅក្រោមអធិបតីភាព លោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា នាថ្ងៃចន្ទ ៤កើត ខែចេត្រ ឆ្នាំច ឯកស័ក ព.ស.២៥៦២ នៅវិទ្យាល័យចំណេះទូទៅ និងបច្ចេកទេស ព្រះបាទសម្តេច ព្រះបរមនាថ នរោត្តម សីហមុនី ខេត្តកំពង់ឆ្នាំង៕
