ឯកឧត្តម គួច ចំរើន អភិបាលខេត្ត និងជាអនុប្រធានកិត្តិយសសាខា កាកបាទក្រហមកម្ពុជា ខេត្តកំពង់ចាម ជម្រុញឲ្យអាជ្ញាធរមូលដ្ឋាន ណែនាំដល់ប្រជាពលរដ្ឋ ដែលសាងសង់លំនៅដ្ឋានថ្មីៗ ត្រូវយកចិត្តទុដាក់ខ្ពស់អំពីបច្ចេកទេស ដើម្បី បញ្ជៀសការខាតបង់ពេលវេលា និងថវិកាគ្រួសារ ។ ថ្លែងយ៉ាងដូច្នេះ ខណៈដែលឯកឧត្ដមអភិបាលខេត្ត បានដឹកនាំប្រតិភូ នាំអំណោយមនុស្សធម៌ កាកបាទក្រហមកម្ពុជា ចែកជូនពលរដ្ឋរងគ្រោះដោយខ្យល់កន្ត្រាក់ ចំនួន ៣៩គ្រួសារ ស្ថិតនៅភូមិព្រែកត្រណាក ឃុំរាយប៉ាយ ស្រុកកងមាស ខេត្តកំពង់ចាម រសៀលថ្ងៃទី២៤ ខែមិថុនា ឆ្នាំ២០១៩ នេះ ។
ឯកឧត្ដម គួច ចំរើន មានប្រសាសន៍ថា នាព្រឹកម៉ិញនេះ ឯកឧត្ដម និងក្រុមការងារ បានចុះទៅពិនិត្យផ្ទាល់ នៃលំនៅដ្ឋាន របស់បងប្អូនប្រជាពលរដ្ឋ ១កន្លែង ដែលទើបតែសាងសង់ថ្មី ស្ថិតនៅក្នុងឃុំជីបាល ស្រុកស្រីសន្ធរ ដែលបានដួលរលំទាំងស្រុង ដោយសារកន្ត្រាក់នោះ ។
ឯកឧត្ដមថា បើតាមការពិនិត្យជាក់ស្ដែង គឺមូលហេតុរលំនេះ ដោយសារតែ ការសាងសង់លំនៅដ្ឋាននោះ ពុំបានអនុវត្តត្រឹមត្រូវ ទៅតាមលក្ខណៈបច្ចេកទេស នោះឡើយ ពីព្រោះថា បើពិនិត្យទៅលើសសរបេតុង និងជើងតាង នៅផ្នែកខាងក្រោម ដែលបាក់នោះ វាមានទំហំធំ តែមិនរឹងមាំទាល់តែសោះ ។ ឯកឧត្ដមអភិបាលខេត្ត មានប្រសាសន៍ថា ការចាក់បេតុង ដែលមានសរសរធំហើយ ពុំមែនមានន័យថា សុទ្ធតែរឹងមាំនោះទេ សំខាន់លើការសាងសង់ ឲ្យបានត្រូវទៅតាមបទដ្ឋានបច្ចេកទេស ។ ការសាងសង់លំនៅដ្ឋាន មិនបានត្រឹមត្រូវទៅតាមបច្ចេកទេស នាំឲ្យខាតបង់ទាំងពេលវេលា និងទាំងថវិកាគ្រួសារ ផងដែរ ពីព្រោះថា បច្ចុប្បន្ននេះ អាកាសធាតុមានការប្រែប្រួល ដែលពិភពលោក បាននឹងកំពុងយកចិត្តទុកដាក់ ជាទីបំផុតនោះ ។
អំណោយមនុស្សធម៌របស់សម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ចែកជូនប្រជាពលរដ្ឋរងគ្រោះ ដោយខ្យល់កន្ត្រាក់ទាំង ៣៩គ្រួសារ ក្នុងមួយគ្រួសារៗ ទទួលបានអង្ករ ២៥គីឡូក្រាម ឃីតមួយកញ្ចប់ មី ១កេស ទឹកស៊ីអ៊ីវ ៦ដប ទឹកត្រី ៦ដប ត្រីខ ១០កំប៉ុង និងថវិកា ១០ម៉ឺនរៀល ៕
