អាជ្ញាធរខេត្តបន្ទាយមានជ័យរួមជាមួយក្រុមការងារថ្នាក់ជាតិចុះជួយមូលដ្ឋាន និងភាគី ពាក់ព័ន្ធ បាននិងកំពុងបន្តសកម្មភាពប្រឹងប្រែង ក្នុងការចុះអន្តរាគមន៍ជួយបូមទឹកសង្គ្រោះ ដំណាំស្រូវប្រជាកសិករដែលកំពុងប្រឈមខ្វះខាតទឹកដោយគ្រោះធម្មជាតិនៅតំបន់មួយចំនួនរបស់ខេត្តនេះ។
ក្នុងឱកាសចុះពិនិត្យមើលសកម្មភាពមូមទឹកពីស្ទឹងមង្គលបូរី ត្រង់ចំណុចវត្តហ្លួងស៊ីសុ វត្ថិរតនារាម ដើម្បីទាញយកទឹកទៅជួយស្រោចស្រពដំណាំស្រូវបង្កើនរដូវប្រមាណជាង១០០ហិកតានៅវាលល្បោះចារ ភូមិផាស៊ីស្រា ឃុំឫស្សីក្រោក ស្រុកមង្គលបូរី ដែលកំពុងប្រឈម ការខ្វះទឹក កាលពីថ្ងៃអង្គារ ៥រោច ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២០ ខែសីហា ឆ្នាំ២០១៩ ឯកឧត្ដម អ៊ុំ រាត្រី អភិបាលខេត្តបន្ទាយមានជ័យ បានធ្វើការអះអាងថា នៅកន្លែងណាដែលមានប្រភពទឹកអាចជួយបានយើងនៅតែបន្តជួយដោះស្រាយជានិច្ចចំពោះស្រូវប្រជាកសិករដែលកំពុងប្រឈមខ្វះខាតទឹក ដោយសារកត្តាប្រែប្រួលអាកាសធាតុនេះ។ ក្នុងនោះឯកឧត្តមអភិបាលខេត្តបានជួយប្រេងចំនួន ៤០០លីត្រ ដល់សហគមន៍បូមទឹក ក្នុង ភូមិផាស៊ីស្រា និង១០០លីត្រទៀតជួយដល់សហគមន៍ភូមិសំរោង ដើម្បីបន្តបូមទឹកជួយដល់ ដំណាំប្រជាកសិករក្នុងតំបន់នេះ។
ជាមួយនេះដែរ ឯកឧត្តមអភិបាលខេត្តបន្ទាយមានជ័យ បានជំរុញដល់អាជ្ញាធរដែនដី ក្រុមការងារមន្ទីរធនធានទឹក មន្ទីរកសិកម្មរួម និងកសិករម្ចាស់ស្រែ ត្រូវបង្កើនការយកចិត្តទុក ដាក់ថែមទៀត ដោយប្រឹងប្រែងឱ្យអស់លទ្ធភាពគ្រប់មធ្យោបាយដែលមាន ក្នុងការចុះជួយ សង្គ្រោះដំណាំស្រូវនៅលើតំបន់ដែលកំពុងប្រឈមខ្វះទឹកស្រោចស្រពនោះ។
យោងតាមរបាយការណ៍មន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ បានឱ្យដឹងដែរថា ការងារបង្កបង្កើនផលស្រូវវស្សាឆ្នាំ២០១៩នេះ មកដល់ពេលសប្តាហ៍ទី៣ ខែសីហានេះ ទូទាំងខេត្តអនុវត្តន៍បានជាង ២៤០.០០០ហិកតា ស្នើ៩៩ភាគរយ នៃផែនការ២៥១.៣០០ហិកតា ។ ប៉ុន្តែដោយសារគ្រោះរាំងស្ងួត បានបង្កឱ្យប៉ះពាល់លើផ្ទៃដីជាង៤៧.០០០ហិកតា ក្នុងនោះខូចខាតជាង ១.០០០ហិកតា តែបាននិងកំពុងបូមទឹកសង្គ្រោះបានរាប់ពាន់ហិកតា ។
ឯកឧត្តម អ៊ុំ រាត្រី បានឱ្យដឹងទៀតថាដោយសារតែមានភ្លៀងធ្លាក់រាយប៉ាយប៉ុន្មានថ្ងៃ មកនេះបានធ្វើឱ្យដំណាំស្រូវភាគច្រើននៅតំបន់ខ្លះបានលូតលាស់ឡើងវិញជាបន្តបន្ទាប់៕
