ថ្ងៃអង្គារ ១២រោច ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៧ ខែសីហា ឆ្នាំ២០១៩ ឯកឧត្តម ម៉ៅ ហាក់ អគ្គលេខាធិការរង នៃអាជ្ញាធរទន្លេសាប និងជាប្រធានក្រុមមុខព្រួញចុះជួយខេត្តកណ្តាល ខេត្តកំពង់ស្ពឺ និងរាជធានីភ្នំពេញ អមដំណេីរជាមួយដោយ លោក ជុន ប៉េងឡុង និងលោក ជង សេងអុីម ទីប្រឹក្សាក្រសួងធនធានទឹក និងឧតុនិយម រួមនិងមន្ទីរធនធានទឹក និងឧតុនិយមខេត្តកណ្តាល ចូលរួមសហការដោយលោកអភិបាល ស្រុកកណ្តាលស្ទឹង លោកប្រធានការិយាល័យជំនាញ និង លោកក្រុមប្រឹក្សាឃុំទាំង២ បានចុះពិនិត្យស្ថានភាពទឹក និងការងារបង្កបង្កេីនផលស្រូវ ដែលប៉ះពាល់ដោយខ្វះទឹកដេីម្បីអន្តរាគមន៍បូមទឹកបំពេញបន្ថែមជាលេីកទី២ ដោយម៉ាស៊ីន ៦៥សេះចំនួន ០២គ្រឿងនៅ ឃុំរការ និងឃុំរលាំងកែន ដែលមានផ្ទៃដីខ្វះទឹកប្រមាណ ៧០ហិកតា ។
-បន្ទាប់មកក្រុមការងារបានបន្តដំណេីរទៅពិនិត្យ ស្ថានភាពទឹក និងការងារបង្កបង្កេីនផលនៅ ៣ឃុំ គឺឃុំក្រាំងម្កាក់ ឃុំព្រៃពួច និងឃុំលំហាច ស្រុកអង្គស្នួល ដែលជារួមការងារបង្កបង្កេីនផល មានការប្រឈមខ្វះខាតទឹកនៅតំបន់មួយចំនួនតូចបេីសិនពុំមានភ្លៀងក្នុងរយៈពេល មួយសប្តាហ៍ខាងមុខ ឯមួយភាគធំទៀត បាននិងកំពុងបូមយកទឹកពីប្រឡាយតាហោ និងប្រឡាយដំណាក់អំពិល ។
