រាជធានីភ្នំពេញ៖ ដើម្បីចូលរួមពន្លឿនការអនុវត្តគោលនយោបាយជាតិស្ដីពីសុខភាពសិក្សា និងផែនការយុទ្ធសាស្ត្រវិស័យអប់រំឆ្នាំ ២០១៩-២០២៣ ព្រមទាំងធ្វើឱ្យការអនុវត្តកម្មវិធីលើកកម្ពស់សុខភាពតាមសាលារៀន មានភាពគ្រប់ជ្រុងជ្រោយ ក្នុងគោលដៅរួមចំណែកកាត់បន្ថយអត្រាជំងឺឆ្លង ជំងឺមិនឆ្លង និងគ្រោះថ្នាក់ផ្សេងៗដល់អ្នកសិក្សា និងបុគ្គលិកអប់រំ ដែលជាកត្តាមិនអាចខ្វះបានក្នុងការចូលរួមពង្រឹងគុណភាពអប់រំ និងការអភិវឌ្ឍធនធានមនុស្សប្រកបដោយកិត្យានុភាព ក្រសួងអប់រំ យុវជន និងកីឡាបានផ្តួចផ្តើមបង្កើត “ក្រុមការងារបច្ចេកទេសលើកកម្ពស់សុខភាពតាមសាលារៀន” ។
កិច្ចប្រជុំក្រុមការងារបច្ចេកទេសលើកកម្ពស់សុខភាពតាមសាលារៀន ត្រូវបានរៀបចំឡើងជាលើកដំបូង ក្រោមការដឹកនាំដោយ លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា។ ក្នុងឱកាសនោះ លោកជំទាវ បានថ្លែងអំណរគុណចំពោះវត្តមាននៃការអញ្ជើញចូលរួមរបស់អង្គភាព ស្ថាប័ន និងដៃគូអភិវឌ្ឍន៍ពាក់ព័ន្ធសរុបចំនួន ២៣ផ្សេងគ្នា ក្នុងកិច្ចប្រជុំនេះ ដែលបង្ហាញពីការយកចិត្តទុកដាក់ គាំទ្រ លើកកម្ពស់ ផ្ដល់អាទិភាពលើការងារលើកកម្ពស់សុខភាពតាមសាលារៀន។
សូមជម្រាបថា កិច្ចប្រជុំក្រុមការងារបច្ចេកទេសលើកកម្ពស់សុខភាពសិក្សាតាមសាលារៀន ត្រូវបានរៀបចំឡើងលើកទី១ បន្ទាប់ពីគោលនយោបាយជាតិស្ដីពីការលើកកម្ពស់សុខភាពសិក្សា ត្រូវបានអនុម័តដោយគណៈរដ្ឋមន្ត្រី ព្រមទាំងត្រូវបានផ្សព្វផ្សាយអនុវត្ត ចាប់តាំងពីខែឧសភា ឆ្នាំ២០១៩កន្លងទៅនេះ។ ក្នុងរយៈពេលប៉ុន្មានខែចុងក្រោយនេះ ក្រោមកិច្ចប្រឹងប្រែងរបស់នាយកដ្ឋានជំនាញ និងមន្ត្រីជំនាញនៃក្រសួង និងស្ថាប័នពាក់ព័ន្ធ និងដៃគូពាក់ព័ន្ធ ការងារនេះអនុវត្តបាននូវលទ្ធផលការងារមួយចំនួន។
លោកជំទាវបានគូសបញ្ជាក់ថា យុទ្ធសាស្ត្រចតុកោណដំណាក់កាលទី៤ នីតិកាលទី៦ បានកំណត់ការអភិវឌ្ឍធនធានមនុស្សជាអាទិភាពទី១ ដើម្បីបង្កើតបានមូលធនមនុស្ស ឆ្លើយតបបរិបទនៃបដិវត្តឧស្សាហកម្ម ៤.០ និងបរិបទនៃយុគសម័យឌីជីថល។ ស្ថិតក្នុងបរិបទនេះ កម្ពុជាត្រូវការត្រៀមខ្លួន ដើម្បីធ្វើយ៉ាងសម្រេចបាននូវការផលិតបានធនធានមនុស្ស ដែលបានត្រៀមលក្ខណៈជាស្រេចចំពោះបដិវត្តឧស្សាហកម្ម ៤.០៕
០៩ តុលា ២០១៩ | សណ្ឋាគារសាន់វ៉េ
