(ភ្នំពេញ)៖ អាជ្ញាធរររាជធានីភ្នំពេញ បានត្រៀមលក្ខណៈរួចរាល់ហើយ សម្រាប់រៀបចំពិធីទទួលទានអំបុកខ្មែរ ការពារជាតិ សាសនា ព្រះមហាក្សត្រ នាថ្ងៃទី០៩ ខែវិច្ឆិកា ឆ្នាំ២០១៩ ដែលចំនឹងថ្ងៃបុណ្យខួបអនុស្សាវរីយ៍លើកទី៦៤ នៃទិវាបុណ្យឯករាជជាតិ០៩វិច្ឆិកាដែរ។
ដើម្បីឲ្យដំណើរការ នៃការរៀបចំពិធីនេះបានប្រព្រឹត្តិទៅដោយរលូន និងទទួលបានជោគជ័យ ឯកឧត្តម មាន ចាន់យ៉ាដា អភិបាលរងរាជធានីភ្នំពេញ ដោយមានគោលការណ៍ និងការណែនាំពីឯកឧត្តម ឃួង ស្រេង អភិបាលរាជធានីភ្នំពេញ នាព្រឹកថ្ងៃទី១៦ ខែតុលា ឆ្នាំ២០១៩នេះ ឯកឧត្តមបានដឹកនាំកិច្ចប្រជុំមួយ ជាមួយក្រុមការងារថ្នាក់ខណ្ឌ និងមន្ត្រីជំនាញ ដើម្បីរៀបចំពិធីនេះឲ្យបានរលូន។
ឯកឧត្តម មាន ចាន់យ៉ាដា បានបញ្ជាក់ថា ការបើកឲ្យមានកិច្ចប្រជុំនេះឡើង ដើម្បីឲ្យក្រុមការងារខណ្ឌទាំងអស់ និងមន្ត្រីជំនាញរៀបចំពិធីនេះឲ្យបានរលូន ទៅតាមគម្រោងដែលរដ្ឋបាលរាជធានីភ្នំពេញ បានគ្រោងទុក។ លោកបានគូសបញ្ជាក់ថា នៅទូទាំងរាជធានីភ្នំពេញ នឹងរៀបចំពិធីទទួលទានអំបុក ប្រមាណជាង៩០០ទីតាំង ដូច្នេះទេលោកសូមឲ្យប្រជាពលរដ្ឋចូលរួមទទួលទានអំបុក ដើម្បីការពារជាតិ សាសនា ព្រះមហាក្សត្រ ទាំងអស់គ្នា។
ឯកឧត្តម មាន ចាន់យ៉ាដា ក៏បានអំពាវនាវឲ្យប្រជាពលរដ្ឋចូលរួមសប្បាយរីករាយ និងអបអរសាទរ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងប្រព្រឹត្តិទៅនៅថ្ងៃទី១០-១១-១២ ខែវិច្ឆិកា ឆ្នាំ២០១៩ខាងមុខនេះ រួមជាមួយនឹងមោទនភាព ចំពោះសមិទ្ធផលនានារបស់រាជធានីភ្នំពេញ ដែលបាននិងកំពុងរីកចម្រើនយ៉ាងខ្លាំងក្លានាប៉ុន្មានឆ្នាំចុងក្រោយនេះ។
គួរបញ្ជាក់ផងដែរថា សម្រាប់ពិធីទទួលទានអំបុក ដែលធ្វើឡើងនៅថ្ងៃទី០៩ ខែវិច្ឆិកានេះ រដ្ឋបាលរាជធានីភ្នំពេញ គ្រោងនឹងធ្វើនៅរមណីយដ្ឋានវត្តភ្នំ។ ដោយឡែកសម្រាប់ខណ្ឌ និងមន្ទីរផ្សេងៗទៀត ក៏នឹងត្រូវប្រារព្ធពិធីនេះឡើងផងដែរ ដោយមានការចូលរួមពីប្រជាពលរដ្ឋ មិនតិចជាង១០ម៉ឺននាក់នោះទេ៕
