នាវាទេសចរណ៍បរទេសមួយគ្រឿង មានឈ្មោះ COSTA FORTUNA បាននាំភ្ញៀវទេសចរបរទេសចម្រុះជាតិសាសន៍ជិត ៣.០០០ នាក់ ចូលចតនៅកំពង់ផែអន្តរជាតិក្រុងព្រះសីហនុ ដើម្បីធ្វើទស្សនកិច្ចនៅព្រះរា ជាណាចក្រកម្ពុជារយៈពេល ១ថ្ងៃ មុននឹងចាកចេញទៅកាន់ប្រទេសសិង្ហបុរី។ ការចូលចតរបស់នាវានេះ ធ្វើឡើងកាលពីព្រឹកថ្ងៃអាទិត្យ ១២កើត ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៨ ខែធ្នូ ឆ្នាំ ២០១៩។
បើតាមមន្ត្រីច្រកទ្វារកំពង់ផែអន្តរជាតិក្រុងព្រះសីហនុ បានឱ្យដឹងថា នាវាទេសចរណ៍ COSTA FORTUNA មានសញ្ជាតិ ITALY មានបណ្ដោយ ២៧២.១៥ម៉ែត្រ ទទឹង ៣៥.៥០ម៉ែត្រ និងមានជម្រៅទឹក ៨ម៉ែត្រ បាននាំភ្ញៀវទេសចរណ៍ចម្រុះជាតិសាសន៍ជិត ៣.០០០នាក់ ក្នុងនោះភ្ញៀវទេសចរសរុបមានចំនួន២.៦៨៣នាក់ ស្រី១.៤៥០នាក់ មាន ៦៣សញ្ជាតិ និងមាន នាវិកសរុបចំនួន ៩៨៩នាក់ ស្រី ១៨៣នាក់ មាន ៤១សញ្ជាតិ ។
ជាមួយគ្នានេះ នាវាទេសចរណ៍ COSTA FORTUNA បាននាំភ្ញៀវទេសចរណ៍បរទេសចម្រុះជាតិសាសន៍មកពីប្រទេសថៃ ចូលចតនៅកំពង់ផែអន្តរជាតិក្រុងព្រះសីហនុប្រកបដោយសុវត្ថិភាព នៅវេលាម៉ោង៨ និង ១៥នាទី នាព្រឹកថ្ងៃទី០៨ ខែធ្នូ ឆ្នាំ២០១៩។ នាវានេះក៏មានគម្រោងចាកចេញពីដែនទឹក នៃព្រះរាជាណាចក្រកម្ពុជា នៅវេលាម៉ោង ១៨រសៀល នាថ្ងៃដដែលនេះ ដើម្បីឆ្ពោះទៅកាន់ប្រទេសសិង្ហបុរី។ ភ្ញៀវទេសចរបរទេសដែលធ្វើដំណើរតាម នាវាទេសចរណ៍ COSTA FORTUNA កម្សាន្តតាមតំបន់រមនីយដ្ឋាននានា ក្នុងខេត្តព្រះសីហនុ ទីប្រជុំជនផ្សារ តំបន់មាត់សមុទ្រ និងតំបន់នេសាទទំនប់រលក ស្ថិតក្នុងសង្កាត់លេខ១ ក្រុងព្រះសីហនុ ៕
