ខ្ញុំឆ្លាត ខ្ញុំ​លាង​ដៃ​នឹង​សាប៊ូ! អបអរសាទរ​ទិវា​ពិភពលោក​លាង​សម្អាត​ដៃ និង​ទិវា​អនាម័យ​នៅ​តាម​គ្រឹះស្ថាន​សិក្សា


ខេត្ត​ស្វាយ​រៀង៖ សម្តេច​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បាន​លើក​ឡើង​ថា ការ​លើក​កម្ពស់​អនាម័យ​មាន​សារសំខាន់​ខ្លាំង​ណាស់ ព្រោះ​វា​ជួយ​ជំរុញ​យើង​ទាំង​អស់​គ្នា ឱ្យ​យក​ចិត្ត​ទុក​ដាក់​ប្រមូលផ្ដុំ​ធនធាន​មនុស្ស និង​សក្ដានុពល​គ្រប់​យ៉ាង ដើម្បី​ឈាន​ទៅ​សម្រេច​បាន​នូវ​ទស្សនៈ​វិស័យ និង​គោលដៅ​របស់​រាជរដ្ឋាភិបាល​ដែល​បាន​កំណត់​ថា ឆ្នាំ​២០២៥ “​ប្រជាជន​គ្រប់រូប នៅ​សហគមន៍​ជនបទ ត្រូវ​មាន​ការ​ផ្គត់ផ្គង់​ទឹក​ស្អាត និង​អនាម័យ​គ្រប់គ្រាន់ ព្រម​ទាំង​រស់​នៅ​ក្នុង​បរិស្ថាន​ដែល​មាន​អនាម័យ​ប្រកប​ដោយ​និរន្តរភាព។

ការ​ប្រារព្ធ​ទិវា​ពិភពលោក​លាង​សម្អាត​ដៃ និង​អនាម័យ​នៅ​តាម​គ្រឹះស្ថាន​សិក្សា​ ជា​ការ​ជួយ​ជំរុញ​បន្ថែម​ទៀត​សម្រាប់​ចូលរួម​ដើម្បី​ឈាន​ទៅ​សម្រេច​ គោលដៅ​របស់​រាជរដ្ឋាភិបាល​ដែល​បាន​កំណត់​នៅ​ឆ្នាំ​២០២៥ ព្រោះ​ថា ការ​លាង​សម្អាត​ដៃ​ កាត់​បន្ថយ​អត្រា​ឆ្លង​ជំងឺ​ផ្សេងៗ កាត់​បន្ថយ​អត្រា​មរណភាព​របស់​កុមារ​ទាក់ទង​នឹង​ជំងឺ​រាក ជំងឺ​រលាក​ផ្លូវ​ដង្ហើម និង​កង្វះ​អាហារូបត្ថម្ភ។

កម្មវិធី​នេះ​បាន​ប្រព្រឹត្ត​ទៅ​ក្រោម​អធិបតីភាព​ លោក​ជំទាវ គឹម សេដ្ឋានី រដ្ឋលេខាធិការ​ក្រសួង​អប់រំ យុវជន និង​កីឡា។ កម្មវិធី​នេះ​ក៏​មាន​ការ​ចូលរួម​ពី​សំណាក់​តំណាង​ដៃគូអភិវឌ្ឍ មន្ត្រី​ក្រោម​​ឱវាទ​ក្រសួង​អប់រំ តំណាង​ស្ថាប័ន​ពាក់ព័ន្ធ​។ ៩ ធ្នូ ២០១៩ | ខេត្ត​ស្វាយរៀង