ឯកឧត្តម ទិត ចន្ថា អញ្ចើញជាអធិបតីភាពក្នុងពិធីបើកសិក្ខាសាលាចែករំលែកបទពិសោធន៍ស្តីពី ការសិក្សាស្រាវជ្រាវ និងគោលនយោបាយជាតិលើវិស័យទេសចរណ៍

ឯកឧត្តម ទិត ចន្ថា រដ្ឋលេខាធិការក្រសួងទេសចរណ៍ បានមានប្រសាសន៍ថា រាជរដ្ឋាភិបាលក្រោមការដឹកនាំដ៏ត្រឹមត្រូវ និងឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បច្ចុប្បន្នប្រទេសកម្ពុជាមានសុខសន្តិភាព ស្ថេរភាពនយោបាយ សន្តិសុខ សណ្តាប់ធ្នាប់ពេញលេញ និងមានការរីកចំរើនលើគ្រប់វិស័យ ក្នុងនោះវិស័យទេសចរណ៍មានការរីកចំរើន គួរអោយកត់សម្គាល់។ ដោយឈរលើគោលការណ៍នៃការអភិវឌ្ឍទេសចរណ៍ប្រកបដោយនិរន្តភាព និងការទទួលខុសត្រូវស្របតាមចក្ខុវិស័យ ទេសចរអន្តរជាតិបានមកទស្សនាកម្ពុជាមានការកើនឡើងជាលំដាប់ពីមួយឆ្នាំទៅមួយឆ្នាំ។

ឯកឧត្តម រដ្ឋលេខាធិការ បានលើកឡើងពីសារៈសំខាន់នៃការសិក្សាស្រាវជ្រាវក្នុងគោលនយោបាយទេសចរណ៍ធ្វើឱ្យយើងអាចមើលឃើញពីបញ្ហា និងសិក្សាស្វែងរកដំណោះស្រាយ ជួយក្នុងការអភិវឌ្ឍ និងផ្តល់បទពិសោធន៍ទេសចរណ៍ដែលអាចឆ្លើយតប ឬបន្ថែមលើសពីការរំពឹងទុករបស់ភ្ញៀវទេសចរ និងជួយបង្កើតការច្នៃប្រឌិតនិងគាំទ្រដល់ការអភិវឌ្ឍទេសចរណ៍។

នាឱកាសនេះផងដែរ លោកជំទាវ ប៉ូច វរលក្ខណ៍ នាយកវិទ្យាស្ថានជាតិទេសចរណ៍ បានមានប្រសាសន៍ថា៖ ការស្រាវជ្រាវមិនត្រឹមតែមានសារៈសំខាន់សម្រាប់និស្សិតនិងអ្នកសិក្សាប៉ុណ្ណោះទេប៉ុន្តែគឺសម្រាប់អ្នកជំនាញទាំងអស់ ជាពិសេសការសិក្សាស្រាវជ្រាវក្នុងវិស័យទេសចរណ៍ ត្រូវធ្វើឡើងក្នុងភាពជាដៃគូ ដើម្បីចងក្រងជាឯកសារស្នាដៃឆ្នើម និងផ្សព្វផ្សាយទេសចរណ៍ ដោយត្រូវផ្តោតទៅលើរមណីយដ្ឋានវប្បធម៌ ធម្មជាតិ ប្រវត្តិសាស្រ្ត និងការគោរពនូវតម្លៃប្រពៃណី ទំនៀមទំលាប់របស់ជាតិ ក្នុងន័យធ្វើឱ្យព្រះរាជាណាចក្រកម្ពុជា ក្លាយជាគោលដៅទេសចរណ៍មួយដែលមានការជ្រើសរើសពីសំណាក់ទេសចរជាតិ និងអន្តរជាតិ ដោយធ្វើការបង្កើតយន្តការសិក្សាស្រាវជ្រាវ និងផ្សព្វផ្សាយ សមស្របតាមសន្ទុះរីកចម្រើននៃវិស័យទេសចរណ៍ ការសិក្សាស្រាវជ្រាវដើរតួនាទីជាស្ពានដើម្បីសំរេចគោលដៅ។