រាជធានីភ្នំពេញ៖ តបតាមការអញ្ជើញរបស់ក្រុមហ៊ុន Big Bad wolf ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានផ្ដល់កិត្តិយសដ៏ខ្ពង់ខ្ពស់ទស្សនាទិដ្ឋភាពនៅថ្ងៃចុងក្រោយ នៃការតាំងពិព័រណ៍សៀវភៅលំដាប់ពិភពលោកក្នុងរាជធានីភ្នំពេញ។
ការដាក់តាំងពិព័រណ៍សៀវភៅនេះគឺជាការចូលរួមចំណែកលើកកម្ពស់វិស័យអប់រំ ដែលជាផ្នែកមួយជួយអភិវឌ្ឍសង្គម និងដើម្បីទាក់ទាញប្រជាពលរដ្ឋ ជាពិសេសយុវជនឲ្យចាប់អារម្មណ៍លើអំណាន។ ការតាំងពិព័រណ៍នេះគឺមានរយ:ពេល១២ថ្ងៃគឺចាប់ពីថ្ងៃទី០៩ ដល់ថ្ងៃទី២០ ខែមករា ឆ្នាំ២០២០។
ក្នុងឱកាសនេះដែរ ដើម្បីជាការលើកទឹកចិត្ត ឯកឧត្ដមរដ្ឋមន្ត្រី បានប្រគល់ប័ណ្ណសរសើរជូនដល់ក្រុមហ៊ុន Big Bad Wolf ដែលបានរៀបចំបង្កើតកម្មវិធីនេះឡើង។ សូមបញ្ជាក់ដែរថា ក្រុមហ៊ុន Big Bad Wolf ត្រូវបានគេស្គាល់ថាជាក្រុមហ៊ុនលក់សៀវភៅធំបំផុតនៅលើពិភពលោក ដែលបានចាប់ផ្ដើមនៅប្រទេសម៉ាឡេស៊ី លើកដំបូងនៅក្នុងឆ្នាំ ២០០៩ ជាគំនិតរបស់ BookXcess ដែលជាហាងលក់សៀវភៅតូចមួយដែលចាប់ផ្ដើម បង្កើតឡើងក្នុងឆ្នាំ២០០៧ដោយ Andrew Yap និង Jacqueline៕