ខេត្តស្វាយរៀង ៖ កម្មវិធីសន្និបាតបូកសរុបវាយតម្លៃលទ្ធផលការងារអប់រំ យុវជន និងកីឡា ឆ្នាំសិក្សា២០១៨-២០១៩ និងលើកទិសដៅឆ្នាំសិក្សា២០១៩-២០២០ ត្រូវបានប្រារព្ធឡើងដើម្បីបូកសរុបវាយតម្លៃការងារអប់រំ យុវជន និងកីឡា ក្នុងឆ្នាំសិក្សាចាស់ និងលើកទិសដៅ សម្រាប់ឆ្នាំសិក្សាថ្មី ព្រមទាំងជាឱកាសនៃការពិភាក្សាយ៉ាងទូលាយ និងស៊ីជម្រៅដើម្បីប្រមូលធាតុចូលថ្មីៗសម្រាប់រៀបចំផែនការសូចនាករ ។
ពិធីបិទសន្និបាតបូកសរុបវាយតម្លៃការងារអប់រំ យុវជន និងកីឡាខេត្តស្វាយរៀង ឆ្នាំសិក្សា២០១៨-២០១៩ និងទិសដៅឆ្នាំសិក្សា ២០១៩-២០២០ ត្រូវបានប្រារព្ធឡើងក្រោមអធិបតីភាព ឯកឧត្តម តូច ប៉ូលីវ៉ា អភិបាលនៃគណៈអភិបាលរងខេត្តស្វាយរៀង ព្រមទាំងមានវត្តមាន លោកប្រធាន- អនុប្រធាន មន្ទីរ តំណាងមន្ទីរពាក់ព័ន្ធ លោកស្នងការនគរបាលខេត្ត លោកមេបញ្ជាការប្រតិបត្តិការសឹករងខេត្ត លោកមេបញ្ជាការកងរាជអាវុធហត្ថខេត្ត លោកស្រីអភិបាលរងក្រុងស្វាយរៀង តំណាងសហគមន៍ លោក លោកស្រីប្រធានការិយាល័យអប់រំ យុវជន និងកីឡាក្រុង ស្រុកទាំង៨ លោក លោកស្រីជាបុគ្គលិកអប់រំ និងតំណាងអង្គការដៃគូអភិវឌ្ឍ។
ក្នុងឱកាសនោះឯកឧត្ដមបានថ្លែងអំណរគុណដល់បុគ្គលិកអប់រំគ្រប់លំដាប់ថ្នាក់ ដែលខិតខំបំពេញភារកិច្ចដោយការទទួលខុសត្រូវខ្ពស់ និងអង្គការដៃគូអភិវឌ្ឍដែលចូលរួមគាំទ្រវិស័យអប់រំ យុវជន និងកីឡាខេត្តស្វាយរៀង ឱ្យមានរីកច្រើន។ ឯកឧត្ដមក៏បានផ្តល់អនុសាសន៍ដល់គ្រប់គ្រឹះស្ថានសិក្សាទាំងអស់ ត្រូវចូលរួមប្រកួតប្រជែងអង្គភាពផ្តល់សេវាគំរូវិស័យអប់រំឆ្នាំថ្មីទាំងបឋមសិក្សា និងមធ្យមសិក្សា។ សាលារៀនត្រូវមានបរិស្ថានស្អាត មានអនាម័យ និងចំណីអាហារគុណភាព-សុវត្ថិភាព ដើម្បីសិស្សទទួលទានមានសុខភាពល្អ ចូលរួមគោរពច្បាប់ចរាចរណ៍ ពិសេសបើកបរពាក់មួកសុវត្ថិភាព និងជៀសឱ្យឆ្ងាយពីគ្រឿងញៀន៕
២៤ មករា ២០២០ | ខេត្តស្វាយរៀង