កំពង់ឆ្នាំង: ខេត្តកំពង់ឆ្នាំង បានចាប់ផ្តើមសាងសង់ កំពង់ផែថ្មីមួយទៀត នៅតំបន់អភិវឌ្ឍន៍ ស្ថិតនៅក្នុងសង្កាត់ខ្សាម ក្រុងកំពង់ឆ្នាំង ដើម្បីសម្រួលដល់ ការដឹកជញ្ជូនរបស់ប្រជាពលរដ្ឋ ។
កំពង់ផែថ្មីនេះចាប់ផ្តើមសាងសង់ និងបានធ្វើពិធីក្រុងពាលី បញ្ចុះបឋមសិលា នៅព្រឹកថ្ងៃទី២៦ ខែមករា ឆ្នាំ២០១៧ ក្រោមអធិបតីភាពលោក ឈួរ ច័ន្ទឌឿន អភិបាលខេត្តកំពង់ឆ្នាំង និង លោកស្រី ។
លោក កែវ ពៅ ទីប្រឹក្សារសម្តេចក្រឡាហោម ស ខេង និង ជាប្រធានមន្ទីរសាធារណការ និងដឹកជញ្ជូន ខេត្តកំពង់ឆ្នាំង បានអោយដឹងថា កំពង់ផែចាស់ ស្ថិតនៅភូមិចុងកោះ ក្នុងសង្កាត់ផ្សារឆ្នាំងនោះ លែងអោយមានទៀតហើយ ដើម្បីធ្វើការអភិវឌ្ឍន៍ និងរៀបចំសោភ័ណភាពច្រាំងទន្លេ ។ កំពង់ផែថ្មីនេះ មានទំហំធំ និងមានលក្ខណៈ ល្អប្រសើរជាងមុន បង្ករអោយមានភាពងាយស្រួល ក្នុងការដឹកជញ្ជូនទំនិញ និង កសិផល របស់ប្រជាកសិករ កាន់តែឆាប់រហ័សថែមទៀត ។
លោកឈួរ ច័ន្ទឌឿន អភិបាលខេត្តកំពង់ឆ្នាំង បានគូសបញ្ជាក់ថា កាសាងសង់កំពង់ផែថ្មីនេះ គឺស្ថិតនៅក្នុងគំរោងផែនការ អភិវឌ្ឍន៍ច្រាំងទន្លេង នៅខេត្តកំពង់ឆ្នាំង ដែលអាជ្ញាធរខេត្ត បានស្នើសុំទៅរដ្ឋាភិបាល ។ ផែនការអភិវឌ្ឍន៍ ច្រាំងទន្លេនេះ គឺធ្វើជាជំហាន ដែលដំបូងនោះ អាជ្ញាធរខេត្ត បានធ្វើបំលាស់ទី ផ្ទះបណ្តែតទឹក អោយទៅនៅតាំងថ្មី ដែលចំងាយប្រមាណជាង ២ គីឡូម៉ែត្រ និង ជំហានបន្ទាប់មកទៀត គឺអាជ្ញាធរខេត្ត បានសាងសង់ផ្លូវ ធ្វើកំពង់ផែ តបណ្តាញអគិ្គសនី និង ប្រព័ន្ធទឹកស្អាត ។ បន្ទាប់មកទៀត នឹងធ្វើបំលាស់ទីផ្ទះប្រជាពលរដ្ឋ ដែលរស់នៅតាមច្រាំងទន្លេ មកនៅកន្លែងអភិវឌ្ឍន៍ថ្មីនេះ ។
លោក អភិបាលខេត្ត បានប្រាប់ទៅប្រជាពលរដ្ឋ នៅទីនោះ កុំអោយជឿលើការញុះញង់ ពីជនមួយក្តាប់តួច ដែលបង្កចលាចល ក្នុងសង្គម បំផុសការតវ៉ាដែល គ្មានមូលដ្ឋានច្បាស់លាស់ ដែលធ្វើអោយប៉ះពាល់ ដល់ការអភិវឌ្ឍន៍ខេត្ត និង បាត់បង់នូវ ផលប្រយោជន៍ខ្លួនឯង ៕