ថ្ងៃព្រហស្បតិ៍ ៥រោច ខែមាឃ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៣ ខែកុម្ភៈ ឆ្នាំ២០២០ នៅរដ្ឋបាលខេត្តសៀមរាប មានរៀបចំកិច្ចប្រជុំគណៈកម្មធិការសម្របសម្រួលបច្ចេកទេស របស់ក្រុមប្រឹក្សាខេត្តសៀមរាប អាណត្តិទី៣ ដឹកនាំដោយ លោក ង៉ាន់ ភិរុណ អភិបាលរងខេត្ត និងជាអនុប្រធានគណៈកម្មាធិការសម្របសម្រួលបច្ចេកទេស តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និងមានការចូលរួមពី ឯកឧត្តម សមាជិកក្រុមប្រឹក្សាខេត្ត ឯកឧត្ដម លោក លោកស្រី ប្រធានមន្ទីរ-អង្គភាពពាក់ព័ន្ធជុំវិញខេត្ត សរុបចំនួន ៧៣នាក់។
កិច្ចប្រជុំនេះ ដេីម្បីពិនិត្យ និងពិភាក្សាលេីការងារមួយចំនួនជុំវិញខេត្តដូចជា៖
-ពិនិត្យ ពិភាក្សា និងដោះស្រាយលេីបញ្ហាការលក់ដូររញ៉ែរញ៉ៃនៅជុំវិញរបងមន្ទីរពេទ្យបង្អែកខេត្តសៀមរាប ដែលធ្វេីឲ្យបាត់បង់នូវសោភ័ណភាពក្រុង។
-ពិនិត្យ ពិភាក្សា និងចាត់វិធានការលេីការលុបប្រព័ន្ធទឹកអមសងខាងផ្លូវ SR7 ពីស្រុកពួក ទៅស្រុកអង្គរជុំ ជាពិសេសការសាងសង់បំពានយកដីចំណីផ្លូវ សម្រាប់រំដោះទឹក (ភូមិឈូក ឃុំត្រីញ័រ ស្រុកពួក)។
-ពិនិត្យ ពិភាក្សា និងចាត់វិធានការចំពោះរថយន្តដែលដឹកលេីសទម្ងន់ចរាចរណ៍លេីផ្លូវសាធារណៈ។
-ពិនិត្យ ពិភាក្សា និងដោះស្រាយលេីបញ្ហាប្រជាពលរដ្ឋមួយចំនួនដែលបានចូលកាន់កាប់អាស្រ័យផល និងចាត់ចែងដីពាក់ព័ន្ធនឹងដីព្រៃសហគមន៍ មានទីតាំងនៅភូមិបុស្សធំ ឃុំខ្នារពោធិ៍ ស្រុកសូទ្រនិគម។
-ពិនិត្យ និងផ្ដល់យោបល់លេីសេចក្ដីព្រាងកម្មវិធីវិនិយោគ ០៣ឆ្នាំរំកិល ២០២០-២០២២ របស់រដ្ឋបាលខេត្ត។
-ពិនិត្យ និងធ្វេីបច្ចុប្បន្នភាព នៃការដោះស្រាយលេីសំណួរ-សំណូមពរ ដែលបានលេីកឡេីងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី២ ឆ្នាំ២០១៨។
-ពិនិត្យ ពិភាក្សា និងដោះស្រាយលេីបញ្ជីសំណួរ-សំណូមពរ ដែលបានលេីកឡេីងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំ២០១៩។
បន្ទាប់ពីពិភាក្សាយ៉ាងផុលផុសលើរបៀបវារៈខាងលើកិច្ចប្រជុំសម្រេចបានលទ្ធផលដូចខាងក្រោម ៖
១-បានអនុម័តរបៀបវារៈរួមនៃកិច្ចប្រជុំទទួលបានសំឡេងគាំទ្រ៥៥ លើ៦៦រូប នៃចំនួនសមាជិក គ.ស.ប ទាំងអស់។
២-ស្នើឲ្យមន្ទីរ-អង្គភាពជួយពន្លឿនអំពីផែនការរបស់ខ្លួនដើម្បីដាក់ចូលក្នុងកម្មវិធីនិយោគ ០៣ឆ្នាំរំកិល២០២០-២០២២ឲ្យបានលឿនយ៉ាងយូរត្រឹមថ្ងៃទី២១ ខែកុម្ភៈ ឆ្នាំ២០២០ នេះ។
៣-ស្នើឲ្យមន្ទីរ-អង្គភាពជួយពន្លឿនការរៀបចំឯកសារពាក់ព័ន្ធមករដ្ឋបាលខេត្ត ឲ្យបានលឿនដើម្បីក្រុមការងារងាយស្រួលក្នុងការរៀបចំឯកសារសម្រាប់សន្និបាត។
៤-ចំពោះបញ្ហាសណ្តាប់ធ្នាប់នៅជុំវិញរបងមន្ទីរពេទ្យបង្អែកខេត្ត ក្រុមការងាមានយន្តការដើម្បីរៀបចំការងារនេះឱ្យមានសណ្តាប់ធ្នាប់និងរបៀបរៀបរយសាធារណៈ ហើយនឹងមានចំណាត់ការឆាប់ៗនេះ។
៥-អាជ្ញាធរក្រុង ស្រុកទាំងអស់ត្រូវសហការជាមួយអាជ្ញាធរពាក់ព័ន្ធធ្វើការទប់ស្កាត់រាល់ការសាងសង់សំណង់រំលោភលើដីសាធារណៈ ប្រឡាយ និងការចាក់ដីរំលោភលើប្រឡាយ។
៦-អាជ្ញាធរស្រុកទាំង១១ ត្រូវបន្តធ្វើការទប់ស្កាត់រាល់រថយន្តដឹកទំនិញដែលមិនចូលថ្លឹងជញ្ជីង។
៧-សូមមន្ទីរ អង្គភាព អាជ្ញាធរស្រុកពាក់ព័ន្ធត្រូវធ្វើការទប់ស្កាត់រាល់ការដុតទន្ទ្រានព្រៃឈើ និងតាមចាប់ជនល្មើសដែលបានដុតបំផ្លាញព្រៃឈើដើម្បីយកមកដាក់ទោសទៅតាមច្បាប់។
៨-សូមឲ្យក្រុង-ស្រុក និងមន្ទី-រអង្គភាពទាំងអស់ដែលពាក់ព័ន្ធ ត្រូវធ្វើបច្ចុប្បន្នភាពបន្តលើសំណួរ សំណូមពរនៅក្នុងវេទិការបស់ក្រុមប្រឹក្សារួចផ្ញើជូនក្រុមការងារធ្វើការបូកសរុបបន្តឲ្យបានមុនកិច្ចប្រជុំ គ.ស.បបន្ទាប់៕