កំពង់ចាម: នៅសាលប្រជុំសាលាខេត្តកំពង់ចាម នារសៀលថ្ងៃទី២៤ ខែកុម្ភៈ ឆ្នាំ២០២០នេះ បានបេីកកិច្ចប្រជុំបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ របស់គណៈកម្មាធិការគ្រប់គ្រងគ្រោះមហន្តរាយ និងសមាគមអតីតយុទ្ធជនកម្ពុជា ក្រោមអធិបតីភាពឯកឧត្តមនាយឧត្តមសេនីយ៍គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេសជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងជាអគ្គលេខាធិការសមាគមអតីតយុទ្ធជនកម្ពុជា និងឯកឧត្ដម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត។
បេីតាមរបាយការណ៍របស់ឯកឧត្តម អ៊ុន ចាន់ដា ប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានឲ្យដឹងថា នៅក្នុងភូមិសាស្ត្រខេត្តកំពង់ចាម ក្នុងឆ្នាំ២០១៩កន្លងទៅ មានករណីគ្រោះអគ្គីភ័យ មានចំនួន៣៦ បណ្តាលឲ្យឆេះផ្ទះ៥៥ខ្នង ឆេះឡូចំហុយថ្នាំជក់០១កន្លែង កុដិលោក០១ខ្នង និងអគាររោងចក្រ០១ខ្នង។ ករណីខ្យល់កន្ត្រាក់ មានចំនួន២៤ករណី បណ្តាលឲ្យរលំផ្ទះចំនួន៤៥ខ្នង របើកដំបូលផ្ទះ៤២១ខ្នង របើកដំបូលព្រះវិហារ កុដិ សាលាឆាន់០៧ខ្នង របើកដំបូលអគារសិក្សា១៥ខ្នង និងរបួសមនុស្សចំនួន០៣នាក់។ ករណីរន្ទះបាញ់មានចំនួន០៩ករណី បណ្តាលឲ្យស្លាប់មនុស្ស០៤នាក់ របួស១០នាក់ ងាប់គោ០៣ក្បាល បាញ់សសរផ្ទះ០២ខ្នង និងដំបូលអគារសិក្សា០១ខ្នង។ ករណីបាក់ស្រុតច្រាំងទន្លេ មានចំនួន០៧ករណី ប្រវែង១៩,៦៥២ម៉ែត្រ ទទឹងចាប់ពី៥ ទៅ៣០ម៉ែត្រ ក្នុងនោះ ខូចផ្លូវលេខ២២៣ ប្រវែង៣០០ម៉ែត្រ ស្រុតខឿនការពារច្រាំងទន្លេប្រវែង៥០ម៉ែត្រ និងផ្ទះចំនួន៧៧ខ្នងត្រូវបានរុះរើ។ ដោយឡែកអំពីស្ថានភាពកម្ពស់ទឹកទន្លេមេគង្គក្នុងឆ្នាំ២០១៩ ខេត្តកំពង់ចាមទទួលរងផលប៉ះពាល់ចំនួន០៩ក្រុង-ស្រុក ស្មើនឹង៤៧ឃុំ-សង្កាត់ បណ្តាលឲ្យប៉ះពាល់ ២៧,៨៣៣គ្រួសារ ស្លាប់មនុស្សចំនួន១០នាក់ លិចផ្ទះចំនួន២២,១៣៤ខ្នង សាលារៀន៦៨កន្លែង វត្តចំនួន៥៨កន្លែង វិហារឥស្លាម០៧ន្លែង និងមណ្ឌលសុខភាព០៥កន្លែង ជម្លៀសប្រជាពលរដ្ឋចំនួន៤,១៧៨គ្រួសារ និងសត្វគោចំនួន៩,៥២០ក្បាល ទៅកាន់ទួលសុវត្ថិភាព ផងដែរ។
ឯកឧត្តមទេសរដ្ឋមន្រ្តី គន់ គីម បានថ្លែងការកោតសរសើរ ចំពោះមន្ត្រីកពាក់ព័ន្ធទាំងអស់ដែលបានខិតខំធ្វេីការដោះស្រាយបញ្ហាចំពោះមុខ ព្រមទាំងបានធ្វេីការណែនាំដល់មន្ត្រីពាក់ព័ន្ធត្រូវរួមសហការគ្នា អន្តរាគមន៍ជួយសង្គ្រោះដល់ប្រជាពលរដ្ឋ ដែលរងផលប៉ះពាល់ដោយគ្រោះធម្មជាតិ ខ្យល់កន្ត្រាក់ អគ្គិភ័យ និងឧបទ្ទវហេតុផ្សេងៗ ឲ្យទាន់ពេលវេលា ហើយត្រូវយកបទពិសោធន៍នាពេលកន្លងមក ដេីម្បីលេីកទិសដៅឆ្នាំ២០២០នេះផងដែរ។ ជាពិសេសមិនត្រូវបំភ្លេចពីគុណបំណាច់របស់អតីតយុទ្ធជន ដែលមានស្នាដៃបម្រើជាតិនោះឡេីយ ៕
