(ព្រៃវែង)៖ នៅព្រឹកថ្ងៃទី ៣ ខែមីនា ឆ្នាំ២០២០ បានប្រារព្ធពិធីអបអរសាទរខួបលើកទី ១០៩ ទិវាអន្តរជាតិនារី ៨ មីនាឆ្នាំ២០២០ ក្រោមប្រធានបទ(មានសន្តិភាព មានការលើកកម្ពស់សមភាពយេនឌ័រ) ដែលមានការចូលរួមពីឯកឧត្តម ស្បោង សារ៉ាត ប្រធានក្រុមប្រឹក្សាខេត្តនិងលោកជំទាវ ឯកឧត្តម ឧកញ្ញ៉ា សុខ ផេងតំណាងរាស្ត្រមណ្ឌលព្រៃវែង លោកជំទាវ គង់ សាឡន តំណាងរាស្ត្រមណ្ឌលព្រៃវែង ឯកឧត្តម ជា សុមេធី អភិបាលខេត្ត និងមន្ទីរអង្គភាពនានាយ៉ាងច្រើនកុះករ។
លោកជំទាវ លៀង ស្រីម៉ុល អភិបាលរងខេត្ត បានលើកឡើងអំពីសិទ្ធិសេរីភាពរបស់ស្ត្រីក្នុងការចូលរួមចំណែកយ៉ាងសំខាន់ក្នុងការអភិវឌ្ឍប្រទេសជាតិ ដូចប្រធានបទថា «មានសន្តិភាព មានការលើកកម្ពស់សមភាពយេនឌ័រ» គឺមានគោលបំណងបញ្ជាក់ពីតម្លៃនៃសន្តិភាព និងអរគុណសន្តិភាព ដែលបានប្រែក្លាចប្រទេសកម្ពុជាពី បាតដៃទទេ គ្មានសិទ្ធិសេរីភាព គ្មានសិទ្ធិមនុស្ស ប្រែក្លាយទៅជាប្រទេសប្រកបដោយសន្តិភាព ស្ថិរភាព សេរីភាព ប្រជាធិបតេយ្យ នីតិរដ្ឋ និងកំពុងអភិវឌ្ឍន៍លើគ្រប់វិស័យ ព្រមទាំងមានការចូលរួមដោយស្មើភាព និងស្មើសិទ្ធិជាមួយបណ្តាប្រទេសនានា ទាំងក្នុងតំបន់ និងសកលលោក។ លោកជំទាវក៏លើកឡើងបន្ថែមទៀតថា ស្ត្រីគឺជាឆ្អឹងខ្នងដ៏សំខាន់ ក្នុងការចូលរួមចំណែកកសាង និងអភិវឌ្ឍន៍ប្រទេសជាតិ ឱ្យមានការរីកចម្រើនជាលំដាប់។
ឯកឧត្តម ស្បោង សារ៉ាត់ ប្រធានក្រុមប្រឹក្សាខេត្ត និងឯកឧត្តម ជា សុមេធី អភិបាលខេត្ត បានមានប្រសាសន៍ថា ការលើកកម្ពស់សមភាពយេនឌ័រ ជាពិសេស វប្បធម៌អហិង្សាដែលរាជរដ្ឋាភិបាល បាននឹងកំពុងគាំទ្រជំរុញ ឱ្យមានការចូលរួមពីគ្រប់ស្ថាប័ន រួមទាំងបុរស ទាំងស្ត្រី ដើម្បីវឌ្ឍនៈភាពសង្គមឆ្ពោះទៅលើកកម្ពស់សិទ្ធិ ស្ថានភាព ជីវភាព ឋានៈ តួនាទីរបស់ស្ត្រី ក៏ដូចជាសុខុមាលភាពសង្គម ដោយធ្វើការទប់ស្កាត់ និងកាត់បន្ថយអំពើហិង្សា ព្រមទាំងដោះស្រាយជម្លោះនានាដោយសន្តិវិធី។
ឯកឧត្តម ទាំងពីរ បានបន្ថែមទៀតថា កម្ពុជានាពេលបច្ចុប្បន្ននេះ បាននឹងកំពុងឆ្ពោះទៅរកកិច្ចការអភិវឌ្ឍន៍រីកចម្រើនលើគ្រប់វិស័យ ហើយសមិទ្ធិផលទាំងនេះ ស្តែងចេញមកពីកត្តាសន្តិភាព ក្រោមការដឹកនាំដ៏ប៉ិនប្រសព្វរបស់រាជរដ្ឋាភិបាលដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តម ទាំងពីរបានណែនាំដល់ស្ត្រី ត្រូវពង្រឹងសមត្ថភាពរបស់ខ្លួនបន្ថែមទៀត ក្នុងការចូលរួមកិច្ចការងារ សង្គមជាតិ និងធ្វើយ៉ាងណាឱ្យក្លាយខ្លួនជាអ្នកដឹកនាំដ៏ល្អ ក្នុងកិច្ចការបម្រើជាតិ និងប្រជាពលរដ្ឋ ឱ្យមានតម្លាភាព និងបានអំពាវនាវដល់យុវជនជំនាន់ក្រោយទាំងអស់ ដែលជាទំពាំងស្នងឬស្សី ត្រូវចូលរួមថែរក្សាប្រពៃណីវប្បធម៌របស់ខ្លួនឱ្យបានល្អ ចៀសវាងការហូរចូលនូវវប្បធម៌បរទេស ដែលធ្វើឲ្យប៉ះពាល់ទៅដល់ គិត្តិយស សេចក្តីថ្លៃថ្នូរ និងសីលធម៌សង្គមរបស់ប្រទេសជាតិយើង៕
